काठमाडौं । लुम्बिनी प्रदेशमा आज माओवादी केन्द्रका संसदीय दलका नेता कुलप्रसाद केसीले मुख्यमन्त्रीमा दाबी पेश गर्दै हुनुहुन्छ । विपक्षी गठबन्धनको तर्फबाट केसीले नयाँ सरकारको नेतृत्वका लागि दाबी पेश गर्न लाग्नुभएको हो ।
केसीलाई माओवादी केन्द्र, नेपाली कांग्रेस, जनता समाजवादी पार्टी र राष्ट्रिय जनमोर्चाको समर्थन छ । विपक्षी दलका ४१ सांसदको हस्ताक्षरसहित मुख्यमन्त्रीमा दाबी पेश गर्न लागिएको एक सांसदले बताए ।
मुख्यमन्त्री शंकर पोखरेलको बुधबार राजीनामा दिएपछि प्रदेश प्रमुख अमिक शेरचनले दलहरूलाई सरकार गठनका लागि दाबी पेश गर्न बिहीबार दिउँसो ३ बजेसम्मको समयसीमा दिनुभएको थियो ।
मुख्यमन्त्री शंकर पोखरेललाई हटाउन विपक्षी दलहरुले तेस्रो पटक अविश्वासको प्रस्ताव ल्याएपछि पोखरेलले बुधबार पदबाट राजीनामा दिनुभएको हो । यस अघि वैशाख ६ गते र बैशाख २६ गते विपक्षी दलले अविश्वासको प्रस्ताव प्रदेशसभा सचिवालयमा दर्ता गरेका थिए । दुवै प्रस्तावमा कुलप्रसाद केसीलाई मुख्यमन्त्रीको रुपमा अघि सारिएको थियो ।
कांग्रेस र माओवादी केन्द्रबीच आठ–आठ महिना मुख्यमन्त्री बन्ने सहमती भएको छ। जस अनुसार आगामी फागुन १ गतेसम्म माओवादी केन्द्रका कुलप्रसाद केसी मुख्यमन्त्री बन्नुहुनेछ भने फागुन २ गतेदेखि बाँकी कार्यकाल कांग्रेसका वीरेन्द्रप्रसाद कनौडिया मुख्यमन्त्री बन्ने सहमति भएको छ ।
लुम्बिनी प्रदेश सभामा हाल ८० जना सांसद छन्। जस अनुसार विपक्षी दलसँग कांग्रेसका १९, माओवादी केन्द्रका १९ (सभामुख सहित) जसपाका ३ र राष्ट्रिय जनमोर्चासँग एकजना सांसद छन् ।
