काठमाडौँ । पर्यटन क्षेत्रका सङ्घसंस्थाले कोभिड–१९ महामारीबाट थलिएको मुलुकको पर्यटन क्षेत्रको पुनरुत्थानका लागि नौ बुँदे माग राखेका छन् ।
होटेल सङ्घ नेपाल, नेपाल पर्वतारोहण सङ्घ, ट्रेकिङ एजेन्सिज एसोसिएसन अफ नेपाल (टान), नेपाल एसोसिएसन अफ टुर एन्ड ट्राभल एजेन्ट्स (नाट्टा), टुरिस्ट बस एसोसिएसन अफ नेपाललगायत १३ भन्दा बढी संस्थाले २०७८ साउन २७ संयुक्त विज्ञप्ति जारी गर्दै कोभिड महामारीले अत्यन्तै प्रभावित बनेको पर्यटन उद्योगलाई बचाउन यस्तो माग अघि सारेका हुन् ।
व्यवसायीले आर्थिक वर्ष २०७८÷७९ को बजेटमा घोषणा गरिएका पर्यटनसँग सम्बन्धित नीति तथा कार्यक्रम लागु गर्दै देशभरि पर्यटकीय गन्तव्यहरूमा अग्रपङ्क्तितमा रही खटिएका पर्यटन सेवाप्रदायक व्यवसायी तथा सम्बन्धित क्षेत्रका कामदार, कर्मचारी एवम् सरोकारवालालाई कोभिड–१९ विरुद्धको खोप लगाउने व्यवस्था महिनादिनभित्र उपलब्ध गराउन माग गरेका छन् ।
साथै सम्पूर्ण नेपालीलाई कोभिड विरुद्धको खोप उपलब्ध गराई विश्व पर्यटन क्षेत्रमा विश्वसनीय वातावरणका लागि पहल गर्न र सम्पूर्ण पर्यटकीय क्षेत्र खुल्ला गर्न आग्रह गरिएको छ । कोभिड खोपको मात्रा पूरा गरी नेपाल आउने पर्यटकलाई क्वारेन्टिन बस्नुनपर्ने व्यवस्था गर्न तथा त्रिभुवन अन्तर्राष्ट्रिय विमानस्थल र अन्य प्रवेश बिन्दुमा पिसिआर टेस्टको व्यवस्था गरी पोजिटिभले मात्र क्वारेन्टिन बस्नुपर्ने व्यवस्था गर्ने, नेपालको सबै स्रोत बजार (पर्यटक बस्ने देशसहर) मा भिसा जारी गर्ने निकाय नरहेकाले पर्यटकको यात्रा सहजीकरण र नेपाल घुम्न प्रेरित गर्नका लागि अनलाइन भिसा (इभिसा) सेवा प्रणालीमार्फत सहज रूपमा भिसा अन–अराइभल व्यवस्था लागु गर्न पनि व्यवसायीले माग गरेका छन् ।
त्यसैगरी स्वास्थ्य सुरक्षा प्रोटोकल कार्यान्वयन प्रभावकारी बनाउन देशव्यापी तालीम तथा अनुगमन संयन्त्रको व्यवस्था गरिनुपर्ने, कोभिड–१९ सङ्कट व्यवस्थापन केन्द्र (सिसिएमसी) मा पर्यटन सम्बद्ध मुख्य छाता सङ्गठनका अध्यक्षमध्येबाट प्रतिनिधित्व हुनुपर्ने, पर्यटक सवारी सम्बन्धमा तुरुन्तै जारी हुन लागेको इम्बोस्ड नम्बर प्लेट पर्यटक सवारी साधनमा हाल भइरहेको हरियो प्लेटजस्तै छुट्टै किसिमको पहिचान हुने गरी व्यवस्था हुनुपर्ने तथा पर्यटक सवारी सहज रूपमा मुलुकका विभिन्न प्रदेशमा विना रोकटोक थप आर्थिक भारबिना झन्झटरहित आवागमन गर्न पाउनुपर्ने माग विज्ञप्तिमा उल्लेख छ ।
ट्रेकिङ, टुर, राफ्टिङलगायत अन्य साहसिक कम्पनीको न्यूनतम अधिकृत पुँजी २५ लाख बराबरको बिनाधितो शून्य प्रतिशत ब्याज दरमा ऋणको व्यवस्था गर्ने । यस्तो ऋणको अधिकतम अवधि पाँच वर्ष कायम गर्ने तथा कोभिड–१९ का कारणले पर्यटन यातायात सञ्चालन नभएको अवस्थामा सवारी कर पूर्ण रूपले छुट गर्नाका साथै आव २०७६/७७ र २०७७/७८ को जरिवाना पूर्ण छुट गर्नुपर्ने पर्यटकीय यातायात व्यवसायीका लागि तीन प्रतिशतमा कर्जा उपलब्ध गराउनुपर्ने व्यसायीको माग छ ।
