पुष्कर भट्ट, कञ्चनपुर ।
कञ्चनपुरको वेदकोट नगरपालिका वडा ७ गाउजीस्थित प्रेमसिंह धामी आधारभूत विद्यालयमा अभिभावक भेला भएको छ । विद्यालयमा करिब एक महिनादेखि लागेको ताला खोल्ने पहल नभएपछि अभिभावक थप संघर्षमा उत्रिएका छन् ।
संघर्ष समितिका संयोजक मोहन बहादुर चन्दको अध्यक्षतामा भएको भेलाले विद्यालय व्यवस्थापन समितिका अध्यक्ष गोकर्णराज जोशी र प्रधानअध्यापक मदनराज जोशीको राजीनामा मागेको छ । भेलाले पदीय मर्यादा विपरित काम गरेको आरोप लगाउँदै प्रधानाध्यापक जोशीलाई कारबाहीसहित सरुवा गर्न माग गरेको छ ।
संघर्ष समितिका सहसंयोजक पुष्कर भट्टले सञ्चालन गरेको कार्यक्रममा स्थानीय अभिभावक, समाजसेवी, बुद्धिजीवीहरूले धारणा राखेका थिए ।
विद्यालयमा गत साउन ६ गते करार शिक्षक छनोटको क्रममा धाँधली भएको भनी साउन ८ गतेदेखि स्कुल प्रशासनमा लगाइएको ताल्चा अहिलेसम्म खुलेको छैन । विवादितका बिच व्यवस्थापन समितिका सदस्यहरूले सामुहिक राजीनामा दिइसकेका छन् ।
यो पनिः अध्यक्ष र प्रअले ‘धाँधली गरेको’ भन्दै सदस्यहरूले दिए सामुहिक राजीनामा
