पुष्कर भट्ट, महेन्द्रनगर ।
कञ्चनपुरको वेदकोट नगरपालिका–७ गाउजीस्थित प्रेमसिंह धामी स्मृति आधारभूत विद्यालय व्यवस्थापन समितिका सदस्यहरूले सामुहिक राजीनामा दिएका छन् ।
शिक्षक छनोट प्रक्रियामा अध्यक्ष र प्रधानअध्यापकले धाँधली गरेको आरोप लगाउँदै समितिका सदस्यहरूले राजीनामा दिएका हुन् ।
शुक्रबार व्यवस्थापन समितिका सदस्यहरू पदम सिंह साउँद, जानकी भट्ट र पशुपती लुहार तथा शिक्षक अभिभावक संघका अध्यक्ष चन्द्रा चन्द, सदस्यहरू जस्मा कार्की, नन्दा ओड, नन्दा देवी ठगुन्ना र हर्क बहादुर चाडले राजीनामा दिनुभएको हो ।
उहाँहरूले वेदकोट नगरपालिका –७ का वडाअध्यक्ष वीरबहादुर चौधरीमार्फत नगर शिक्षा समितिलाई राजीनामा बुझाउनु भएको हो।
विद्यालयमा गत साउन ६ गते करार शिक्षक छनोटको क्रममा धाँधली भएको भनी साउन ८ गतेदेखि स्कुल प्रशासनमा लगाइएको ताल्चा अहिलेसम्म खुल्न सकेको छैन।
विद्यालय व्यवस्थापन समितिका अध्यक्ष गोकर्णराज जोशी र प्रधानअध्यापक मदनराज जोशीले करारमा शिक्षक छनौट गर्दा प्रश्नपत्र आउट गरेको भन्दै स्थानीयले संघर्ष समिति गठन गरेर आन्दोलन गर्दै आएका छन् ।
