काठमाडौँ । बुद्ध एयरले यही साउन ३१ देखि भरतपुर–भैरहवा उडान सुरुवात गर्ने भएको छ ।
कम्पनीका भरतपुर शाखा प्रबन्धक भक्तबहादुर बस्नेतले हप्तामा आइतबार, बुधबार र शुक्रबार दिउँसो १२ः५५ बजे तीन उडान गर्न लागेको जानकारी दिनुभयो ।
उहाँले भन्नुभयो– ‘पर्यटकीय नगरीसँग हवाइ उडान जोड्नका लागि उडान सुरु गर्न लागिएको हो ।’
भैरहवा उडानका लागि एकतर्फी भाडा रु दुई हजार ८३५ देखि चार हजार ३३५ सम्म तय गरिएको छ । बुद्ध एयरले भरतपुर–काठमाडौँ नौ उडान गरिरहेको छ । त्यस्तै भरतपुर–पोखरा दैनिक एक उडान छ ।
सुरुवातमा भैरहवा १८ सिट जहाजबाट उडान सुरु गर्न लागिएको प्रबन्धक बस्नेतले बताउनुभयो । २००५ बाट चितवनमा उडान सुरुआत गरेको कम्पनीले निषेधाज्ञा अघिसम्म भरतपुर–काठमाडौँ दैनिक १२ उडान भर्दै आएको थियो ।
चितवन तेस्रो पर्यटकीय गन्तव्य हो । पोखरा र भैरहवा देशकै प्रमुख पर्यटकीय गन्तव्यमा पर्दछन् । उडानको सञ्जाल जोडिएसँगै पर्यटक बढ्ने अपेक्षा गरिएको छ ।
