काठमाडौँ । नियत र नैतिकताको कारण देखाउँदै जनता–समाजवादी पार्टी (जसपा) को विवादमा सांसद रेशम चौधरी तटस्थ बसेका छन् ।
जसपाको आन्तरिक विवादमा हस्ताक्षर सनाखत गराउन २०७८ साउन ११ गते निर्वाचन आयोग पुगेका चौधरी तटस्थ बसेका हुन् ।
चौधरीले निर्वाचन आयोग पुगेर जसपाका दुबै पक्षका नेतासँग कुरा गरेर बाहिर निस्केपछि पत्रकारसँग आफू तटस्थ बस्ने निर्णय गरेको जानकारी दिएका छन् । उनी निलम्बित प्रतिनिधि सभाका सांसद तथा जसपाका केन्द्रीय कार्यकारिणीका सदस्य हुन् ।
‘आज जेलबाट निर्वाचन आयोग आएर पक्ष र विपक्षको सनाखत गर्न मेरो नियत र नैतिकताले दिएन’ उनले भनेका छन्– ‘मेरो पक्ष पनि जसपा हो, विपक्ष पनि जसपा हो र म जसपाको एउटा कार्यकर्ता हुँ ।’
उनलाई जेलबाटै हस्ताक्षर सनाखत गराउने तयारी चलेको थियो । यत्सका लागि आयोगले जेलमा पत्रसमेत पठाएको थियो । तर चौधरीले नमानेपछि उनलाई जेलबाट कडा सुरक्षामाझ निर्वाचन आयोगको कार्यालय कान्तिपथ लगिएको थियो ।
निर्वाचन आयोगमा ५१ सदस्यीय जसपाको केन्द्रीय कार्यकारिणी समितिमा ३४ जना सदस्यले उपेन्द्र र १६ जनाले महन्थको पक्षमा सनाखत गरेका छन् ।
यसअघि दुबै पक्षले आफ्नो पक्षमा चौधरी रहेको बताउँदै आएका थिए । तर चौधरी तटस्थ बसेर सनाखत नगरी फर्किए । उनले आफू निर्दोष रहेको जिकिरसमेत गरे ।
‘निर्दोषीलाई थुन्न पाइँदैन, न्याय पाऊँ श्रीमान् न्याय’ उनले निवेदन गरे ।
उनले आफू निष्ठाको राजनीति गर्नेसमेत दाबी गरे ।
महन्थ ठाकुरलाई भीष्मपितामह दर्जा कायम गर्न सुझाव दिएका चौधरीले युद्वको नियमका कारण बाण हान्नुपरेको महाभारतको प्रसङ्गसमेत सुनाउन भ्याएका थिए ।
जसपाको आधिकारिकता विवादमा आयोगले हेडकाउन्ट (सनाखत) गराएको हो । ५१ जना केन्द्रीय कार्यकारिणी समितिका सदस्यले सनाखत गरिसकेकाले आजै निर्णय दिने तयारी गरेको आयोगले जनाएको छ ।
