काठमाडौँ । पूर्वप्रधानमन्त्री तथा एमाले अध्यक्ष केपी शर्मा ओलीले राजतन्त्र मान्ने वा नमान्ने सन्दर्भमा नेपाली काङ्ग्रेसमा अझै विवाद रहेको दाबी गर्नुभएको छ ।
आफूलाई लोकतान्त्रिक पार्टी ठान्ने काङ्ग्रेसले विगतमा संवैधानिक राजतन्त्रलाई आदर्श मानेर हिँड्नु आश्चर्यजनक रहेको उहाँको टिप्पणी थियो ।
पुष्पलाल स्मृति दिवसको अवसरमा २०७८ साउन ७ गते आयोजित एक कार्यक्रममा बोल्दै ओलीले जन्मसिद्ध श्रेष्ठतालाई मान्ने कार्य कहिल्यै लोकतान्त्रिक नहुने बताए ।
‘मित्रशक्तिलाई एक्ल्याउन खोज्ने, अनेक थरि षड्यन्त्रकारी नन्दीभ्रिङ्गीसँग सहकार्य गर्ने काङ्ग्रेसको नीति २००७ सालदेखिकै हो । आजको नीति पनि त्यही हो । लोकतन्त्र ल्याउन बलिदान गरेर आएको शक्तिसँग सहकार्य गर्न तयार नहुने, लोकतन्त्र विरोधी शक्तिसँग सहकार्य गर्ने काङ्ग्रेसको नीति हो’ उहाँले काङ्ग्रेसमाथि हमला गर्नुभयो ।
‘लोकतन्त्र तथ्यहीन सामन्तवादसँग सम्झौता गर्ने सिद्धान्त होइन । लोकतन्त्र जनताको तन्त्र, जनता सार्वभौम रहेको तन्त्र हो’ ओलीले भन्नुभयो– ‘कुनै परिवारमा जन्मेको आधारमा शासक छानिनुनपर्ने हो, तर नेपाली काङ्ग्रेसले त्यो गर्यो । नेपाली काङ्ग्रेसले संवैधानिक राजतन्त्रलाई हिजो–अस्तिसम्म आफ्नो आदर्श बनायो । आज पनि त्यहाँ राजतन्त्रबारे विवाद चलिरहेकै छ ।’
मन्तव्यको क्रममा उहाँले २००७ सालमा देश नै छाडेर हिँडिसकेका राजालाई नेपालमा फर्काउने काम काङ्ग्रेसले नै गरेको बताउनुभयो ।
‘नेपालमा प्रजातन्त्र आएपछि त्रिभुवन विजयी भएजस्तो देखियो । उनले नै प्रजातन्त्र दिए भन्ने देखियो । प्रधानमन्त्री मोहनशमशेर नै भए । काङ्ग्रेसले गृहमन्त्रीमा सम्झौता गर्यो’ उहाँले थप्नुभयो– ‘काङ्ग्रेस विजयी भएजस्तो हुनुपर्ने थियो, तर कुनामा देखियो ।’
