काठमाडौँ । नेपाली काङ्ग्रेसका सभापति तथा प्रधानमन्त्री शेरबहादुर देउवाले आज विश्वासको मत प्राप्त गर्ने घोषणासँगै राजनीतिक सक्रियता तीव्र भएको छ । खासगरी यस घोषणाले नेकपा (एमाले) पङ्क्तिमा हलचल ल्याएको छ ।
सर्वाेच्च अदालतको गत असार २८ गतेको फैसलाबमोजिम प्रतिनिधि सभाको पुनःस्थापना भएपछि राजनीतिक गतिविधि बढेको हो ।
विश्वासको मत दिन नेता खनालको आग्रह
नेकपा (एमाले) का वरिष्ठ नेता झलनाथ खनालले प्रधानमन्त्री शेरबहादुर देउवालाई विश्वासको मत दिन पार्टीका सांसदलाई आह्वान गर्नुभएको छ ।
स्वास्थ्योपचारका लागि भारतको नयाँदिल्लीमा रहनुभएका पूर्व प्रधानमन्त्री खनालले आज एक विज्ञप्ति जारी गरी प्रतिनिधि सभा विघटन भएको स्थितिमा संसद् जोगाउन आफूहरूसमेतको सहभागितामा सर्वाेच्च अदालतमा रिट निवेदन दिइएकोमा गत असार २८ गते पुनःस्थापना हुने फैसला भएकाले प्रतिनिधि सभालाई जोगाउन लाग्नुपर्ने बताउनुभएको हो ।
नेपाली काङ्ग्रेसका सभापति देउवा नेतृत्वको सरकारलाई प्रतिनिधि सभाको बाँकी कार्यकाल सञ्चालन हुन दिनुपर्ने अन्यथा मुलुकको स्थिति सङ्कटग्रस्त हुने विज्ञप्तिमा जनाइएको छ ।
नेता खनाल, वरिष्ठ नेता माधवकुमार नेपालसहितको २३ सांसदले देउवालाई प्रधानमन्त्री बनाउने प्रस्तावमा समर्थन गर्दै आउनुभएको छ । नेता खनालले वैचारिक र राजनीतिक एकतासहित गत असार २७ गतेको कार्यदलको १० बुँदे सहमति बमोजिम विधिपूर्वक एमालेलाई एकताबद्ध बनाउन पनि उहाँले आह्वान गर्नुभएको छ ।
विश्वासको मत दिने सांसद एमालेमा नरहने
यता, नेकपा (एमाले) ले नेपाली काङ्ग्रेसका सभापति शेरबहादुर देउवालाई विश्वासको मत दिने आफ्ना सांसद पार्टीमा नरहने निष्कर्ष निकालेको छ ।
ललितपुरको च्यासलस्थित तुल्सीलाल स्मृति प्रतिष्ठानमा आइतबार बसेको स्थायी कमिटीको बैठकले पार्टीको निर्णय विपरीत प्रधानमन्त्रीलाई विश्वासको मत नदिन आग्रह गरेको हो । एमालेका वरिष्ठ नेता माधवकुमार नेपाललगायतका सांसद दलको बैठकमा अनुस्थित भई प्रधानमन्त्रीका समर्थनमा देखिएपछि अध्यक्ष केपी शर्मा ओलीको अध्यक्षतामा भएको बैठकले सो निर्णय गरेको छ ।
गत असार २७ गतेको कार्यदलको १० बुँदे सहमतिबमोजिम नेता नेपाल अघि बढ्न नचाहेको ठहर आफूहरूले गरेको एमालेका प्रवक्ता प्रदीपकुमार ज्ञवालीले जानकारी दिनुभयो ।
ह्हिप लगाउने निर्णय गलत : वामदेव गौतम
यता, नेकपा (एमाले) का उपाध्यक्ष वामदेव गौतमले पार्टी स्थायी कमिटीले ह्विप लगाउने निर्णय गर्नु गलत भएको बताएका छन् ।
उपाध्यक्ष गौतमले संविधानको धारा ७६ (५) बमोजिम मतदान गर्दा ह्विप नलाग्ने संवैधानिक इजलासले व्याख्या गरेपछि पनि ह्विप लाग्ने निर्णय गर्नु गलत भएको उनले मिडियालाई जानकारी दिएका छन् ।
‘धारा ७६ (५) बमोजिम मतदान गर्दा ह्विप नलाग्ने संवैधानिक इजलासले व्याख्या गरेपछि ह्विप लाग्ने निर्णय गर्नु गल्ती हुन्छ’ उनले भनेका छन् ।
माओवादी–केन्द्रले विश्वासको मत दिने
त्यस्तै, नेपाल कम्युनिस्ट पार्टी (माओवादी–केन्द्र) ले भने प्रधानमन्त्री शेरबहादुर देउवालाई विश्वासको मत दिने भएको छ ।
सिंहदरबारमा आइतबार बसेको पार्टीको संसदीय दलको बैठकले प्रधानमन्त्रीलाई विश्वासको मत दिने निर्णय गरेको हो ।
सांसद मातृका यादवले प्रधानमन्त्रीलाई विश्वासको मत दिने निर्णय गरेको जानकारी दिनुभयो । उहाँका अनुसार बैठकमा पार्टी अध्यक्ष एवम् संसदीय दलका नेता पुष्पकमल दाहालले मुलुकको पछिल्लो राजनीतिक अवस्थाका बारेमा जानकारी गराउँदै प्रधानमन्त्रीलाई विश्वासको मत दिने बताउनुभएको थियो ।
