खिमराज चालिसे, चण्डीगढ ।
न्याय माग्दै विभिन्न सङ्गठनमा पुगेकी माया विकलाई कतै कुनै सङ्घसस्थाबाट न्याय नमिलेपछि मूल प्रवाह रोपड नगर समितिले न्यायस्वरूप दुई लाख ९६ हजार ५० रुपियाँ दिलाएको छ ।
पति रविबहादुरको निधनपछि करिब २५ वर्षको वैवाहिक जीवन असहायजस्तै भएकी पत्नी माया विकले सहयोग पाऊँ भनी मूल प्रवाह अखिल भारत नेपाली एकता समाजको रोपड नगर समितिमा दिएको निवेदनका आधारमा समाजका प्रतिनिधिहरूले वादी, प्रतिवादी र आफन्तको बिचमा व्यापक छलफलपश्चात गरिएको सर्वपक्षीय सहमतिअनुसार जी.पी.एफ., ग्रेच्युटी, र छुट्टीको रकमको ५० प्रतिशत माया विकलाई दिने लिखित सम्झौतानुसार सो रकम प्रापत भएको हो ।
मूल प्रवाह एकता समाजका केन्द्रीय सदस्य एवम् सुदूर पश्चिमोत्तर क्षेत्रीय समितिका अध्यक्ष प्रेम सापकोटा, क्षेत्रीय सदस्य छविलाल सापकोटा र नगर अध्यक्ष दयाराम लामिछानेले जुलाई १६, २०२१ का दिन सो रकम हस्तान्तरण गरिएको थियो ।
मूल प्रवाह एकता समाजका क्षेत्रीय सदस्य छविलाल सापकोटाका अनुसार माया विकलाई जी.पी.एफ. को ५० प्रतिशत रकम मिले पनि अब पाउन पर्ने ग्रेच्युटी र छुट्टीको पैसाबाट थप रकम मिल्ने छ ।
