काठमाडौं । राष्ट्रिय जनमोर्चाका अध्यक्ष चित्रबहादुर केसीले प्रधानमन्त्री शेरबहादुर देउवालाई विगतका गल्ती नदोहोर्याउन सचेत गराउनु भएको छ ।
बिहीबार सिंहदरबारमा बसेको पाँच दलीय गठबन्धनको बैठकमा विगतका आफ्नै र ओली सरकारका कमजोरी पुनः नदोर्याउन खबरदारी गर्नुभएको हो ।
अध्यक्ष केसीले तत्काल सबै शक्ति कोरोना नियन्त्रणमा लगाउन पनि आग्रह गर्नुभयो । उहाँले अघिल्लो सरकारले गरेका बदनामी काम, असंवैधानिक नियुक्ति, भ्रष्टाचार र कुशासन सच्याउन पनि सुझाव दिनुभयो ।
‘अहिले जनता कोरोनाबाट आक्रान्त छन् । खोपको पर्खाइमा बसेका जनतालाई हिजोको ओली सरकारले कसैले दान देला र खोप लगाइदिउँला भनेर बस्यो’ केसीले भन्नुभयो, ‘अब दानको पखाईमा होइन, जनतालाई बचाउन दुई÷चार अर्ब खर्च गर्न पनि तयार हुनुहोस् । पहिलो प्राथमिकता खोपमा दिनुहोस् ।’
अध्यक्ष केसीले सरकार गठन हुनासाथ फेरि भ्रष्टाचारमा मुछिएका, अपराधिक पृष्ठभूमि भएका मानिसका मुद्दा मामिला फिर्ता गर्न पट्टि लाग्ने, बदनाम र भ्रष्ट मानिसलाई काखी च्याप्ने काम नगर्न सचेत पनि गराउनु भयो । उहाँले सरकारले राम्रो काम गरे समर्थन र नराम्रो कामको भण्डाफोर गर्ने पनि स्पष्ट पार्नुभयो ।
‘हाम्रो पार्टी अहिले सरकारमा जाँदैन । हामी प्रतिपक्षमै बसेर सहयोग गर्छौं’ केसीले थप्नुभयो, ‘ राम्रो काम गरे हामीले सहयोग गर्छौं, नराम्रो काम गरे भण्डाफोर गर्नेछौं ।’
प्रतिनिधि सभा पुनर्स्थापना भएपछि र देउवा प्रधानमनत्री भएपछि पहिलो पटक पाँच दलीय गठबन्धनको बैठक बसेको हो । बैठकमा प्रधानमन्त्री तथा कांग्रेस सभापति देउवा, माओवादी केन्द्रका अध्यक्ष प्रचण्ड, जसपाबाट अध्यक्ष उपेन्द्र यादव सहभागी हुनुहुन्थ्यो ।
बैठकमा एमालेका वरिष्ठ नेता माधवकुमार नेपाल पक्ष पनि सहभागी थियो । सो बैठकमा नेता नेपालको पक्षबाट डा. विजय पौडेल सहभागी हुुनुहुन्थ्यो । देउवालाई प्रधानमन्त्री बनाउन निर्णायक भूमिका खेलेका नेपाल पक्षले विश्वासको मत दिने बताइसकेको छ ।
बैठकमा साउन ३ गतेदेखि संसद बैठक बस्ने भएकोले गठबन्धनले खेल्ने भूमिकाबारे छलफल भएको छ । यस्तै, संसद सञ्चालन, विधेयकहरु ल्याउने विषयमा पनि छलफल भएको बुझिएको छ ।
