बागलुङ । घाँस काट्ने क्रममा एउटा आँखाको ज्योति गुमाएका बागलुङका होमबहादुर अर्गेजालाई उपचारका लागि प्रवासी नेपालीहरुले सहयोग गरेका छन् ।
ढोरपाटन नगरपालिका–४ रिखुवाका अर्गेजालाई थप उपचारको लागि युरोप नेपाली एकता समाज सदस्य तथा आयरल्याण्ड नेपाली समाजका संयोजक अमर छन्त्यालको पहलमा संकलित २ लाख ४१ हजार ६ सय १५ रुपैँया सहयोग गरिएको हो । उहाँलाई बुर्तिबाङमा आज एक कार्यक्रको बिच सो रकम हस्तान्तरण गरिएको छ ।
५५ वर्षीय अर्गेजा रिखुवामा खेती किसानी गरी दैनिकी चलाउँदै आउनुभएको थियो । गत चैत महिनामा घाँस काट्ने क्रममा अचानक काँडाले घोच्दा आँखाको ज्योति गुमेको हो । सामान्य परिवारका अर्गेजालाई उपचारको लागि आर्थिक अभाव देखिएपछि स्वदेश तथा विदेशबाट सहयोग संकलन सुरु गरिएको जनाइएको छ ।
अन्तर्राष्ट्रिय नेपाली एकता समाजका कोषाध्यक्ष तथा हङकङ नेपाली एकता समाजका अध्यक्ष शक्तमान बुढाथोकीको पहलमा संकलित रु १ लाख ९१ हजार केही समय पहिले उहाँलाई प्रदान गरिएको थियो । नियमित चेकजाँचको निम्ति घरदेखि काठमाडौं गइराख्नुपर्ने र उपचार गर्न आर्थिक अभाव देखिएपछि उहाँ समस्यामा पर्नुभएको थियो ।
राजमो ढोरपाटन नगर समिति अध्यक्ष दीपक थापाले सहयोग रकम हस्तान्तरण गर्दै स्वदेश तथा विदेशमा रहेर यस अभियानमा हातेमालो गर्नुहुने अमर छन्त्याल लगायतका टिमलाई धन्यवाद ज्ञापन गर्नुभएको थियो ।
कार्यक्रममा राजमो बागलुङ जिल्ला सल्लाहकार गौरीश्वर पाण्डे, अखिल नेपाल वुद्धिजिवी संघका केन्द्रीय सदस्य धनबहादुर कुँवर, रक्तिम सांस्कृतिक अभियानका ढोरपाटन नगर अध्यक्ष झकप्रसाद श्रेष्ठले मन्तब्य राख्नुभएको थियो ।
कार्यक्रम रक्तिम सांस्कृतिक अभियानका जिल्ला सचिव सहविन अर्गेजाको अध्यक्षता र राजमो ढोरपाटन–४ का वडा सचिव कुल बहादुर छन्त्यालको सञ्लनमा भएको थियो । कार्यक्रममा पीडित होमबहादुर अर्गेजाले सहयोगी सबैलाई धन्यवाद ज्ञापन गर्नुभएको थियो ।
सहयोगीहरुको नामावली :
यस्तो छ भर्पाईः
