काठमाडौं । नेकपा (एमाले) को बैठकमा संघीयताको समीक्षा गर्नुपर्ने प्रस्ताव पेश भएको छ । शुक्रबार बसेको एमाले केन्द्रीय कमिटीको बैठकमा संघीयताको उपादेयताका बारेमा समीक्षा गर्ने प्रस्ताव पेश भएको हो ।
एमाले केन्द्रीय सदस्य तथा युवा इन्चार्ज महोश बस्नेतले बैठकमा संघीयताको समीक्षा हुनुपर्ने प्रस्ताव राख्नुभएको छ । बस्नेतले संघीयतासँगै धर्म निरपेक्षताको बारेमा समेत बहस हुनुपर्ने भन्दै मुलकको विशिष्ठ पहिचानको घोषणा हुनुपर्ने विषय प्रवेश गराउनुभएको थियो ।
बस्नेतको ८ बुँदे प्रस्तावमा प्रत्यक्ष निर्वाचित प्रधानमन्त्री रहने गरी संविधान संशोधन हुनुपर्ने र दुई कार्यकालभन्दा बढी प्रधानमन्त्री बन्न नपाइने उल्लेख छ ।
बस्नेतले बैठकमा प्रस्तुत गरेका बुँदाहरू यस्ता छन्–
१) सङ्घीयताको बारेमा समीक्षा गरौँ ।
२) मुलुकको विशिष्ट पहिचान घोषणा गरौँ ।
३) धर्म निरपेक्षता बारेमा बहस गरौँ ।
४) शासकीय स्वरूपमा प्रत्यक्ष निर्वाचित प्रधानमन्त्री बनाऔँ ।
५) दुई कार्यकाल भन्दा बढी प्रधानमन्त्री नबनाउने संवैधानिक व्यवस्था कायम गरौँ।
६) पार्टी अध्यक्ष २ कार्यकाल पदाधिकारी ३ कार्यकाल भन्दा बस्न नपाउने व्यवस्था गरौँ ।
७) पार्टी र राज्यका राजकीय र शासकीय स्थानमा युवाहरूको ४० प्रतिशत सुनिश्चित गरौँ ।
८) पार्टी महाधिवेशनको राजनैतिक प्रतिवेदन र विधान अनि चुनावको घोषणा–पत्रमा यो विषय सम्बोधन गर्न यो बैठकबाट कार्यदल बनाएर जाऔँ ।
