काठमाडौँ । संसद विघटन विरुद्ध प्रमुख पाँच विद्यार्थी सङ्गठनले काठमाडौँलगायत ७७ वटै जिल्लामा प्रदर्शन गर्ने भएका छन् । त्यस क्रममा विद्यार्थी सङ्गठनहरूले असार १६ गते देशभर प्रधानमन्त्रीको पुतला दहन र असार १७ गते काठमाडौँमा विरोध प्रदर्शनलगायत कार्यक्रम सार्वजनिक गरेका छन् ।
आइतबार बसेको पाँच विद्यार्थी सङ्गठनको संयुक्त बैठकले ७७ वटै जिल्लामा प्रदर्शन गर्ने निर्णय गरेको हो । अखिल (छैठौं), नेपाल विद्यार्थी सङ्घ, अनेरास्ववियु (क्रान्तिकारी), अनेरास्ववियु, समाजवादी विद्यार्थी युनियनका नेताहरूको बैठकले संसद विघटन विरुद्ध सामूहिक प्रतिवाद गर्ने निर्णय गरेको बैठकपछि जारी विज्ञप्तिमा उल्लेख छ ।
प्रधानमन्त्री केपी शर्मा ओलीले प्रतिनिधि सभा विघटन गरेपछि सर्वोच्च अदालतको संवैधानिक इजलासमा बहस जारी छ । स्वतन्त्र अदालको निर्णयमा हस्तक्षेप नगर्न पाँच विद्यार्थी सङ्गठनले सरकारको ध्यानार्षणस्वरूप दबाब दिएका हुन् । संवैधानिक व्यवस्थानुसार अदालतले संसद पुनस्र्थापना गर्नेमा समेत ती सङ्गठनले विश्वास व्यक्त गरेका छन् ।
यस्तै, विश्वविद्यालयमा देखिएका परीक्षालगायत शैक्षिक समस्याका बारेका छलफल गर्न ज्ञापनपत्रसहित उपकुलपतिसमक्ष संयुक्त डेलिगेसन जाने निर्णय गरिएको छ । लकडाउन अवधिको शुल्क विद्यार्थीलाई अविलम्ब फिर्ता गर्न माग गर्दै विज्ञप्तिमा शुल्क फिर्ता नगरिएमा निजी शैक्षिक संस्था विरुद्ध कडा आन्दोलन गर्ने चेतावनी दिइएको छ ।
विज्ञप्तिमा मन्त्रीजस्तो पदको मर्यादासमेत ख्याल नगरी शिक्षामन्त्रीले संविधान र कानुनलाई चुनौती दिने गरी गरेको हर्कतको तीव्र विरोध गर्दै विद्यार्थी सङ्गठनले दलित आन्दोलनप्रति ऐक्यबद्धतासमेत जाहेर गरेका छन् ।
साथै विज्ञप्तिमा सरकारसँग आम विद्यार्थी र शिक्षकलगायतलाई शीघ्र खोप व्यवस्था गरी शैक्षिक वातावरण तयार गर्न माग गरिएको छ ।
