पोखरा । कास्कीको अन्नपूर्ण गाउँपालिकाले ‘एक कृषक एक दुहुनो गाईभैँसी’ कार्यक्रम अभियानका रूपमा सञ्चालन गर्ने भएको छ ।
गाउँपालिकाको आर्थिक वर्ष २०७८/७९ को वार्षिक नीति तथा कार्यक्रममा यसलाई अभियानका रूपमा सञ्चालन गरी दुधलाई आफ्नो दैनिक आयआर्जनको माध्यम बनाउने उल्लेख गरिएको छ ।
दुध उत्पादनमा सहकारिताको विकास गरी पशुपालक कृषक समूहलाई गोठनिर्माण, तथा भकारो सुधार कार्यक्रमलाई निरन्तरताका साथ उत्पादनका आधारमा अनुदान उपलब्ध गराइने गाउँपालिका अध्यक्ष युवराज कँुवरले जानकारी दिनुभयो ।
गाउँपालिकाअन्तर्गतका सहकारी संस्थालाई सबल रूपमा सञ्चालन गर्न पशुबिमा कार्यक्रम सञ्चालन गर्ने, बहुवर्षे भुइँघाँस, पोषिलो हिउँदेघाँस, बहुवर्षे डालेघाँसका बिरुवा लगाउने तथा नर्सरी स्थापना गर्नेजस्ता कार्यक्रम सञ्चालन गरी दुग्ध सङ्कलन तथा चिस्यान केन्द्र स्थापना एवम् विस्तार गर्ने नीति लिइएको छ ।।
व्यावसायिक पशुपालन, पशुबिमा, गोठ तथा भकारो सुधार उन्नत नस्लका गाई, भैँसी तथा बाच्छाबाच्छी, पाडापाडी हुर्काउने कृषकलाई प्रोत्साहन गर्ने, दुध र मासुको उत्पादन वृद्धि गर्न पार्कोटे र लिमेजस्ता रैथाने जातका भैँसिपालन कार्यक्रमलाई प्राथमिकता दिइने गाउँपालिकाले जनाएको छ ।
प्राथमिक पशु उपचार सेवालाई निरन्तरता दिइने अध्यक्ष कुँवरले जानकारी दिनुभयो ।
पशुपालक कृषकमा सिप हस्तान्तरणद्वारा आधुनिक पशुपालन पद्धतिको विकास गर्दै लैजाने कार्यमा जोड दिई कृषक समूह, समिति, सहकारी, गैरसहकारी संस्था र गाउँपालिकाबिच साझेदारीका साथ विशेष कार्यक्रम सञ्चालन गरिने गाउँपालिकाले नीति लिएको छ ।
पशुपालनका क्षेत्रमा आधुनिक प्रविधि सुधार गर्न ‘काम गरेर सिक्छ, देखेर विश्वास गर्छ’ भन्ने नारालाई कार्यान्वयन गर्न व्यावसायिक किसानलाई नमूना पशुपालन फर्मको अवलोकन तथा तालिमजस्ता कार्यक्रम सञ्चालन गरिने अध्यक्ष कुँवरले बताउनुभयो ।
पशुपन्छीतर्फ कुखुरा, कालिज पालन व्यवसायलाई व्यावसायीकरण गरी एक निश्चित मापदण्डका आधारमा अन्डा र मासु उत्पादनमा आत्मनिर्भरताका साथ निर्यात गरी आयआर्जनमा वृद्धि गरिने उहाँले बताउनुभयो । उहाँका अनुसार माछापालन व्यवसायलाई विस्तार तथा वृद्धि गर्न भुरा वितरण तथा पोखरी निर्माण गर्न जोड दिनुका साथै मत्स्यपालन क्षेत्रमा कृषकको आकर्षण अभिवृद्धि गरिने बताइएको छ । (रासस)
