काठमाडौं । प्रधानमन्त्री केपी शर्मा ओलीको भाषणको एउटा भिडियो क्लिप यतिबेला सामाजिक सञ्जालमा भाइरल भएको छ । नागरिकता ऐन संशोधन गर्ने अध्यादेश जारी गरिएपछि प्रधानमन्त्री ओलीले कुनै बेला यही विषयविरुद्ध चर्को भाषण गरेको भिडिओ सामाजिक सञ्जालमा भाइरल बनेको हो ।

सकारको सिफारिसमा राष्ट्रपति विद्यादेवी भण्डारीद्वारा आइतबार नेपाल नागरिकता (पहिलो संशोधन) अध्यादेश, २०७८ जारी गरिएको थियो । प्रधानमन्त्रीले सत्ता जोगाउनका लागि राष्ट्रघात गरेको भन्दै अहिले चौतर्फी आलोचना भइरहेको छ ।

जनता समाजवादी पार्टी (जसपा) का अध्यक्ष महन्थ ठाकुरको मागअनुसार प्रधानमन्त्री केपी शर्मा ओलीले नागरिकतासम्बन्धी ऐन संशोधन गर्न अध्यादेश जारी गराउनुभएको हो । लामो समयदेखि संसदमा विचाराधिन नागरिकतासम्बन्धी विधेयक विवादका कारण अहिलेसम्म पारित हुन सकेको थिएन ।

सत्ता संकटमा परेका ओलीले मधेशवादी दल र खासगरी भारतलाई रिझाएर सत्ता लम्ब्याउन अध्यादेश जारी गराएको भन्दै चर्को आलोचना भएको हो । कुनै बेला ओलीले त्यसैका विरुद्ध चर्को भाषण गरेको भिडिओ अहिले सामाजिक सञ्जालमा भाइरल भइरहेको हो।

प्रधानमन्त्री ओली भाषण गरिरहेको भिडिओ संविधानविद् भीमार्जुन आचार्यले पनि रिट्विट गर्नुभएको छ । त्यसमा आचार्यले लेख्नुभएको छ, ‘प्रधानमन्त्री ओली…आवाज आफैं बोल्छ !’

विवादित नागरिकता विधेयक जारी गर्ने ओलीको कदमलाई नेकपा (एमाले) का नेता भीम रावलले ‘कामचलाउ प्रधानमन्त्रीद्वारा नागरिकतासम्बन्धी विधेयक ल्याइनु आपत्तिजनक’ भनी टिप्पणी गर्नुभएको छ । रावलले लेख्नुभएको छ, ‘प्रधानमन्त्री पद जोगाउन महन्थ–महतो गुटलाई खुशी तुल्याउन नागरिकता जस्तो संवेदनशील विषयलाई हतियार बनाइएको छ । यो निन्दनीय छ ।’

भिडिओमा ओलीको भनाई यस्तो छ, ‘नागिरकताको सवाल, नागरिकता नेपालीले पाउनुपर्छ । उहिले उहिले रानीको जन्मदिवसमा केटाकेटीलाई भेला गेर स्कुलमा चकलेट बाँडिन्थ्यो, नागरिकता चकलेट होइन, बोर्डरमा बसेर आउने जतिलाई दिँदै जाने…।’

सुनौं भिडिओ

प्रधानमन्त्री ओली…आवाज आफै बोल्छ! https://t.co/xSRNHRkCOk

— Bhimarjun Acharya (@BhimarjunPhD) May 23, 2021