काठमाडौं । २१६ मेगावाट क्षमताको माथिल्लो त्रिशूली १ जलविद्युत् आयोजनाका लागि अहिलेसम्मकै सबैभन्दा धेरै विदेशी रकम ऋणका रुपमा भित्रिने भएको छ ।
आयोजना प्रवर्द्धक नेपाल वाटर एन्ड इनर्जी डेभलपमेन्ट कम्पनीका अनुसार जलविद्युत् आयोजनामा हालसम्मकै सबैभन्दा ठूलो प्रत्यक्ष वैदेशिक लगानी ल्याउने गरी माथिल्लो त्रिशूली १ जलविद्युत् आयोजना निर्माणका लागि ऋण लगानीकर्ताको टुंगो लागेको हो । निर्माण अवधिसम्मको ब्याजसमेत गरी कुल ६४ करोड ७३ लाख अमेरिकी डलर लागत अनुमान गरिएको सो आयोजना निर्माणमा विदेशी लगानीकर्ताको ४५ करोड ३२ लाख अमेरिकी डलर ऋणका रूपमा भित्रिन लागेको हो । ३० प्रतिशत स्वपुँजी कम्पनीले लगानी गर्नेछ ।
आयोजना निर्माणका लागि आज (शुक्रबार) नौ अन्तर्राष्ट्रिय ऋणदातासँग सम्झौता हुँदै छ । कम्पनीले ऊर्जा, जलस्रोत तथा सिँचाइमन्त्री वर्षमान पुन, अर्थमन्त्री डा. युवराज खतिवडाको उपस्थितिमा ती अन्तर्राष्ट्रिय ऋणदाताहरूसँग उक्त सम्झौता गर्न लागेको हो । सम्झौतालगत्तै लगानी स्वीकृतिका लागि नेपाल राष्ट्र बैंकमा आवेदन दिने तयारी छ ।
रसुवाको सदरमुकाम धुन्चे र मैलुङको बीचमा पर्ने हाकुमा आयोजना निर्माण हुन लागेको हो । आयोजना स्थलमा अहिले पहुँच मार्ग र साइट अफिस बनाउने काम भइरहेको छ । निर्माण अवधि ५ वर्ष रहेको उक्त आयोजनाबाट वार्षिक १ हजार ५०१ मेगावाट आवर विद्युत् उत्पादन लक्ष्य राखिएको छ । सो आयोजनामा ७२ मेगावाट क्षमताका तीनवटा युनिट रहनेछन् ।
साढे ६ मिटर ब्यासको ९ हजार ७१६ मिटरको हेडरेस सुरुङ बन्नेछ । टेलरेस सुरुङ भने २३८ मिटरको हुनेछ । आयोजनाबाट उत्पादित विद्युत् २२० केभी प्रसारण लाइनमार्फत १० किलोमिटर टाढा रहेको त्रिशूली थ्री बी हब सबस्टेसनमा जोडिनेछ ।
