काठमाडौं । राष्ट्रिय जनमोर्चाले गण्डकी प्रदेश सांसद खिमविक्रम शाहीलाई अस्पतालमा बन्दीको रुपमा राखिएको भन्दै आपत्ति जनाएको छ ।
बुधबार प्रदेश सभामा मुख्यमन्त्री पृथ्वीसुब्बा गुरुङविरुद्धको अविस्वासको प्रस्तावमाथि मतदान हुने समयमा सांसद शाही अनुपस्थित हुनु रहश्यमय भएको र अस्पतालमा बन्दीको रुपमा राखिएको तथा पार्टीका जिम्मेवार नेतालाई समेत भेट्न नदिएको भन्दै राजमोले आपत्ति जनाएको हो ।
बिहीबार वक्तव्य प्रकाशित गरी राजमो उपाध्यक्ष एवम् प्रवक्ता दुर्गा पौडेलले गण्डकी प्रदेश सभाको गतिविधि अस्वाभाविक रहेको भन्दै सांसद शाहीको अवस्थाबारे पार्टीले थप सूचना प्राप्त भएपछि त्यसबारे जानकारी दिने स्पष्ट पार्नुभएको छ ।
यस्तो छ वक्तव्य
गण्डकी प्रदेशमाभएको संसदको गतिविधिलाई लिएर कैयौं प्रश्नहरु उठिरहेका र टिकाटिप्पणी भइरहेका छन् । त्यसबारेमा राष्ट्रिय जनमोर्चाको धारणा स्पष्ट गर्नको लागि यो वक्तव्य जारी गरिएको छ ।
गण्डकी प्रदेशको सरकारकाविरुद्ध आएको अविश्वासको प्रस्तावलाई समर्थन गर्ने हाम्रो पार्टीको प्रष्ट र दृढ नीति छ । तर मतदानको दौरानमा जुन अस्वभाविक प्रकारका घटनाहरु घटे, त्यसप्रति हामीलाई आश्चर्य र दुःख लागेको छ ।
राष्ट्रिय जनमोर्चा गण्डकी प्रदेशका सांसद खिमविक्रम शाहीको मतदानको बेलामा भएको अनुपस्थिति रहस्यमय भएको छ । पछि बुझ्दा उहाँलाई पोखराको एउटा अस्पतालमा भर्ना गरिएको र कसैलाई भेट्न पनि नदिइएको कुरा थाहा भएको छ । गण्डकी प्रदेशका सांसदहरुको स्वाब परीक्षण गर्दा उहाँको पीसीआर रिपोर्ट नेगेटिभ आएको सार्वजनिक भएको थियो । त्यसपछि अकस्मात उहाँको रिपोर्ट पोजेटिभ आएको र अस्पताल भर्ना भएको भन्ने कुरा थाहा हुन गएको छ । सरकारी प्रयोगशालामा जाँच गर्दा नेगेटिभ रिपोर्ट आएको व्यक्तिलाई अकस्मात कसरी पोजेटिभ आयो ? त्यो कुरा बुझ्न हामी असमर्थ छौं ।
अहिले अस्पतालमा कसैलाई पनि उहाँसित भेट गर्न दिइएको छैन । राष्ट्रिय जनमोर्चाका जिम्मेवार केन्द्रीय नेता तथा गण्डकी प्रदेशका सांसदहरु जाँदा पनि उहाँलाई भेट गर्न दिइएको छैन । उहाँलाई एक प्रकारको बन्दीका रुपमा किन राखियो र त्यसको कारण के हो ? उहाँको स्थिति सार्वजनिक गर्नका लागि सरकारसित अनुरोध गर्दछौं ।
गण्डकी प्रदेशको संसदमा क. खिमविक्रम शाही रहस्यपूर्ण तरिकाले अनुपस्थित भएपछि राष्ट्रिय जनमोर्चाकी सचेतक पियारी थापाले उहाँको स्थिति अज्ञात भएकोले उहाँबारे जानकारी गराउन तथा उहाँ उपस्थित नहुँदासम्म संसदमा मतदानलाई स्थगित गर्नका लागि सभामुखकहाँ निवेदन दिनु भएको थियो । त्यसका आधारमा गण्डकी प्रदेशको संसदलार्ई सभामुखले अनिश्चितकालको लागि स्थगित गरेको जानकारी प्राप्त भएको छ ।
गण्डकी प्रदेशको संसदको गतिविधिलाई हामीले अस्वभाविक रुपमा लिएका छौं । संसदको कामलाई सामान्य र स्वभाविक प्रकारले सञ्चालन गर्नुपर्ने आवश्यकतामा जोड दिन्छौं । क. खिमविक्रमशाहीको स्थितिबारे थप सूचना प्राप्त भएपछि हामीले जानकारी दिनेछौं ।
२०७८ वैशाख १६गते
दुर्गापौडेल
उपाध्यक्ष तथा प्रवक्ता
यो पनि : गण्डकी प्रदेश सांसद शाही सम्पर्कविहीन, सदनको कारवाही रोक्न राजमोको माग
