काठमाडौँ । राष्ट्रिय जनमोर्चाले राज्य आफैले न्याय पनि नदिने र विरोध प्रदर्शन गर्दा उल्टै गिरफ्तार गर्ने सरकारको शैलीलाई फासिवादी बताएको छ ।
आज राजधानीको माइतीघर मण्डलामा विरोध प्रदर्शन गर्न थालेका अखिल (छैठौँ) र राष्ट्रिय जनमोर्चाका नेताहरूलाई गरिएको गिरफ्तारीको प्रसङ्गमा राष्ट्रिय जनमोर्चाको यस्तो अभिव्यक्ति आएको हो ।
बैतडीकी छात्रा भागरथी भट्टको बलात्कारपछि हत्या गरिएको विरोध गर्न माइतीघर मण्डला पुगेका अखिल (छैठौँ) र राजमोका नेताहरूलाई गिरफ्तार गरिएपछि राजमोले यस्तो अभिव्यक्ति दिएको हो ।
अध्यक्ष चित्रबहादुर केसीको हस्ताक्षरमा आजै जारी प्रेसवक्तव्यमा यस्तो धारणा व्यक्त गरिएको छ ।
प्रेसवक्तव्यको पूर्ण पाठ यस्तो छ–
“बैतडीको दोगडाकेदार गाउँपालिकाकी १७ वर्षीया किशोरी भागरथी भट्टको बलात्कारपछि पाशविक ढङ्गले हत्या भएको छ । यस प्रकारको बलात्कार र हत्याका घटनाहरू बढ्दो छन् । राज्यले न त्यस प्रकारका घटनाहरूको रोकथाम गर्न सकेको छ, न पीडितलाई न्याय दिन सकेको छ । निर्मला हत्याकाण्डका दोषीहरूलाई अहिलेसम्म पत्ता लाउन सकेको छैन ।
यस प्रकारको स्थितिमा अनेरास्ववियु (छैठौँ) ले किशोरी भागरथी भट्टको बलात्कार र हत्याको विरोधमा आज देशव्यापी विरोधको कार्यक्रम राखेको छ । त्यस क्रममा काठमाडौँको माइतिघर मण्डलामा विरोध प्रदर्शन गर्ने क्रममा राष्ट्रिय जनमोर्चाका केन्द्रीय सदस्य तथा गण्डकी प्रदेशका सांसद का. पियारी थापा, अखिल (छैठौं) का केन्द्रीय अध्यक्ष विमल पोख्रेल, सचिव सुवास जिसी, केन्द्रीय सदस्यहरू विवेक जिसी, प्रतिभा आचार्य तथा विद्यार्थीहरू सुमन पौडेल एवम् ध्रुव बस्याललाई प्रहरीले गिरफ्तार गरेको छ । त्यो गिरफ्तारीले गर्दा उक्त विरोध प्रदर्शनको कार्यक्रम हुन सकेन ।
राज्यले न्याय प्रदान नगर्ने र विरोध पनि गर्न नदिने जुन रवैया अपनाएको छ, त्यो फासिवादी शैली हो । हामीले उक्त कार्यको घोर विरोध र भत्र्सना गर्दछौँ । गिरफ्तारहरूलाई तत्काल रिहाईको माग गर्दछौँ ।”
