टेकराज भुसाल/सन्धिखर्क ।।
राष्ट्रिय जनमोर्चाका केन्द्रीय सदस्य झबिलाल थापाले प्रतिनिधि सभा विघटन गर्दा नेपालको सिङ्गो कम्युनिस्ट बदनाम भएको धारणा व्यक्त गर्नुभएको छ ।
राष्ट्रिय जनमोर्चाले प्रतिनिधि सभा विघटन विरुद्ध देशव्यापी रूपमा चलाएको सङ्घर्षको कार्यक्रमअन्तर्गत माघ १० गते अर्घाखाँचीको भूमिकास्थान नगरपालिका वडा नम्बर २ जोगिथुममा आयोजना गरेको कार्यक्रमलाई सम्बोधन गर्दै नेता थापाले सो बताउनुभएको हो ।
नेता थापाले वर्तमान प्रधानमन्त्री केपी शर्मा ओलीले आफ्नो पार्टीको विवाद मिलाउनुको साटो जनताको हक–अधिकार खोसेको आरोपसमेत लगाउनुभयो ।
दुईतिहाइनजिकैको समर्थन हुँदाहुदै प्रतिनिधि सभा विघटन गरेर सिङ्गो कम्युनिस्टको नै बदनाम गरेको आरोप लगाउदै संसद पुनःस्थापनाका लागि लोकतन्त्रप्रेमीहरू एकजुट हुनुको विकल्प नरहेको नेता थापाले बताउनुभयो ।
अखिल नेपाल ट्रेड युनियन महासङ्घ (अन्टुक) का केन्द्रीय उपाध्यक्ष गोविन्द बिसीले राष्ट्रिय जनमोर्चाले संसद विघटनको विरोध र पुनःस्थापनाको पक्षमा सञ्चालन गरेको एकमहिने कार्यक्रममा सहभागिता भई आआफ्नो स्थानबाट सहयोग गरिदिनुहुन अनुरोध गर्नुभयो ।
कार्यक्रमलाई राष्ट्रिय जनमोर्चाका राष्ट्रिय परिषद सदस्य खड्कबहादुर थापा, अखिल नेपाल किसान महासङ्घ (अप्फा) का अर्घाखाँची जिल्लाध्यक्ष जीवनारायण खनाल, अखिल नेपाल शिक्षक सङ्घका जिल्ला सदस्य बाबुराम खनाललगायतले सम्बोधन गर्नुभएको थियो।
कार्यक्रममा अखिल नेपाल युवक सङ्घका मोहन थापा, भूमिकास्थान–२ का वडाध्यक्ष बुद्धिबहादुर थापा, वडासदस्य सुमित्रा विकलगायतको उपस्थिति रहेको थियो ।
कार्यक्रम राष्ट्रिय जनमोर्चा भूमिकास्थान–२ का अध्यक्ष बाबुराम खनालको अध्यक्षता, राजमो नेता डिल्ली बन्जाडे स्वागत मन्तव्यय र राजमो युवा नेता टेकराज भुसालको सञ्चालन सम्पन्न भएको थियोे ।
