केरसिंह अदै/तौलिहवा ।।
अखिल नेपाल राष्ट्रिय स्वतन्त्र विद्यार्थी युनियन (छैठौं) कपिलवस्तुले आज माघ १० गते खरेन्द्रपुरमा हाजिरीजवाफ प्रतियोगिता सम्पन्न गरेको छ ।
अखिल (छैठौं) का जिल्ला सचिवालय सदस्य टिना अदैको उपस्थिति तथा अखिल (छैठौं) शिवराज नगर समिति अध्यक्ष सञ्जिला बुढामगरको अध्यक्षतामा सो कार्यक्रम सम्पन्न भएको हो ।
प्रतियोगितामा ६० वटा प्रश्न चार वटा ग्रुप बनाएर सोधिएको थियो, जसअनुसार खरेन्द्रपुर ग्रुप, चनौता ग्रुप, नयाँबस्ती ग्रुप र मधवा धनगदव ग्रुपमा विभाजन गरिएको थियो ।
कार्यक्रममा खरेन्द्रपुर ग्रुपले २१ प्रश्नको जवाफ दिएर प्रथम भएको थियो । त्यसैगरी नयाँबस्ती ग्रुपले १० वटा प्रश्नको जवाफ दिएर दोस्रो स्थान प्राप्त गरेको थियो ।
मधवा धनगडवा ग्रुपले आठ प्रश्नको जवाफ दिएर तेस्रो स्थान लिएको थियो । चनौता ग्रुपले छ वटा प्रश्नको जवाफ दिएर चौथो स्थान हासिल गरेको थियो ।
प्रतियोगिता अखिल नेपाल राष्ट्रिय स्वतन्त्र युनियन (छैठौं) जिल्ला समितिले कपी, डटपेनलगायत पुरस्कारको व्यवस्था गरेको थियो ।
कार्यक्रममा अखिल (छैठौं) शिवराज नगर समितिकी कोषाध्यक्ष भारती भण्डारी, अखिल नेपाल ट्रेड युनियन महासङ्घ (अन्टुक) का केन्द्रीय सदस्य तथा राष्ट्रिय जनमोर्चा जिल्ला सल्लाहकार केरसिंह अदैको पनि उपस्थिति रहेको थियो ।
