माधव खनाल/सन्धिखर्क ।।
अखिल नेपाल किसान महासङ्घ (अप्फा) का केन्द्रीय अध्यक्ष भैरवराज रेग्मीले केपी शर्मा ओली सरकारले संविधानको घाँटी निमोठेको आरोप लगाउनुभएको छ ।
राष्ट्रिय जनमोर्चाले प्रतिनिधि सभा विघटन विरुद्ध देशव्यापी रूपमा चलाएको सङ्घर्षको कार्यक्रमअन्तर्गत माघ ९ गते अर्घाखाँचीको भूमिकास्थान नगरपालिका वडा नम्बर १ मा भएको कार्यक्रमलाई सम्बोधन गर्दै अध्यक्ष रेग्मीले सो कुरा बताउनुभएको हो ।
अध्यक्ष रेग्मीले वर्तमान प्रधानमन्त्री केपी शर्मा ओलीले आफ्नो पार्टीको विवाद मिलाउनुको साटो जनताको हक–अधिकार खोसेको आरोपसमेत लगाउनुभयो ।
कार्यक्रमलाई सम्बोधन गर्दै राष्ट्रिय जनमोर्चाका केन्द्रीय सदस्य झबिलाल थापाले दुईतिहाइनजिकैको समर्थन हुँदाहँुदै प्रतिनिधि सभा विघटन गरेर सिङ्गो कम्युनिस्टको नै बदनाम गरेको आरोप लगाउदै संसद पुनःस्थापनाका लागि लोकतन्त्रप्रेमीहरू एकजुट हुनुको विकल्प नरहेको बताउनुभयो ।
अखिल नेपाल ट्रेड युनियन महासङ्घ (अन्टुक) का केन्द्रीय उपाध्यक्ष गोविन्द बिसीले राष्ट्रिय जनमोर्चाले संसद विघटनको विरोध र पुनःस्थापनाको पक्षमा सञ्चालन गरेको एकमहिने कार्यक्रममा सहभागिता भर्इ आआफ्नो स्थानबाट सहयोग गरिदिनुहुन अनुरोध गर्नुभयो ।
कार्यक्रमलाई राष्ट्रिय जनमोर्चाका परिषद सदस्य खड्कबहादुर थापा, अखिल नेपाल किसान महासङ्घ (अप्फा) का अर्घाखाँची जिल्लाध्यक्ष जीवनारायण खनाल, राष्ट्रिय जनमोर्चा भूमिकास्थान नगर सदस्य तथा भूमिकास्थान नगरपालिका वडा नम्बर १ का वडाध्यक्ष भोजराज खनाल, अखिल नेपाल महिला सङ्घकी शान्ता खनाल, अखिल (छैठौं) का जीवन नेपालीलगायतले सम्बोधन गर्नुभएको थियो ।
उक्त कार्यक्रम अखिल नेपाल शिक्षक सङ्घका जिल्ला सदस्य हिमलाल खनाल, नगर सचिव रामप्रसाद खनाल, भूमिकास्थान नगरपालिका वडा नम्बर १ का सदस्यहरू गोपाल नेपाली, चमकला नेपाली, प्रगतिशील पत्रकार सङ्घका टेकराज भुसाल, जनजाति सम्मेलनका प्रतिनिधि भोटबहादुर पुन, जातीय समता समाजका रामबहादुर नेपाली, अखिल नेपाल युवक सङ्घका प्रकाश खनाललगायतको उपस्थिति रहेको थियो ।
कार्यक्रम राष्ट्रिय जनमोर्चाका वडाध्यक्ष मेघराज खनालको अध्यक्षता, जनकराज खनालको स्वागत र माधव खनालको सञ्चालनमा सम्पन्न भएको थियो ।
