काठमाडौँ । राष्ट्रिय जनमोर्चाका नेता बोमबहादुर खत्री अस्पतालबाट डिस्चार्ज हुनुभएको छ । २०७७ माघ ४ गते दिउसो राजधानीस्थित ह्याम्स अस्पतालबाट उहाँ डिस्चार्ज हुनुभएको हो ।
‘अहिले मलाई श्वासप्रश्वासमा समस्या छैन; खोकी बन्द भएको छ; ज्वरो छैन; शरीरको दुखाइ बन्द भएको छ; र, खाना रुचिरहेको छ’ खत्रीले युगदर्शनसित भन्नुभयो– ‘कमजोरीको समस्या भने अझै बाँकी छ ।’
उहाँका अनुसार खत्रीजीको शरीरमा अक्सिजनको मात्रा रेफरेन्सअनुसार नै छ ।
‘डक्टरहरूले कोरोनाको उपचारका लागि दुई दिन होम क्वारेन्टाइनमा बस्न भनेका छन्’ उहाँले भन्नुभयो– ‘त्यसका साथै निमोनिया पूरै ठिक भइनसकेकाले तीन हप्तापछि पुनः अस्पतालमा आउन भनेका छन् ।’
राजमो नेता खत्रीले आफूलाई अहिले १८ दिनको औषधि दिइएको बताउनुभयो ।
गत पुस २७ गते श्वासप्रश्वासमा समस्या भएपछि पुस २८ गते अस्पतालमा भर्ना हुनुभएका राजमो नेता खत्रीलाई डा. अनुप सुवेदीसहितको डक्टर, नर्ससहितको टोलीले उपचार गरेका थिए ।
पहिलो एन्टिजेन परीक्षणमा उहाँको कोरोना नेगेटिभ देखिएको थियो । त्यसपछिको पिसिआर परीक्षणमा पनि कोरोना नेगेटिभ नै देखिएको थियो । तर त्यसपछिको परीक्षणमा कोरोना पोजेटिभ देखिएपछि उहाँलाई डाक्टरहरूले पाँच दिनसम्म रेमडेसिभिर औषधि चलाएका थिए । अहिले उक्त औषधि बन्द गरिएको छ ।
‘विद्यार्थी आन्दोलनका बेला २०३९ सालमा पी.एन. क्याम्पस पोखरामा करङ भाँचिएको थियो’ उहाँले विगत सम्झँदै भन्नुभयो– ‘त्यही समस्याले गर्दा होला, निमोनिया अझै पूरै ठिक भइसकेको छैन ।’
अस्पतालको उपचारप्रति उहाँको कुनै गुनासो छैन ।
‘डाक्टर, नर्ससहितको सम्पूर्ण अस्पताल मेरो उपचारमा राम्ररी खट्नुभयो’ उहाँले भन्नुभयो– ‘त्यसका लागि उहाँहरूलाई धेरै धेरै धन्यवाद दिन चाहन्छु ।’
