प्रकाश थापामगर/काठमाडौँ ।।
अखिल नेपाल प्रगतिशील लेखक सङ्घ (अन्पा) का अध्यक्ष डा. गोविन्दप्रसाद आचार्यले युद्धप्रसाद मिश्र नयाँ जनवादी क्रान्तिपक्षीय साहित्यकार भएको बताउनुभएको छ ।
अन्पाद्वारा २०७७ पुस २९ गते आयोजित ‘प्रगतिशील साहित्यिक आन्दोलनमा युद्धप्रसाद मिश्र’ विषयक परिसंवाद कार्यक्रममा मन्तव्य राख्दै उहाँले यस्तो अभिव्यक्ति दिनुभएको हो ।
‘साहित्यकार मिश्र नेपालमा नयाँ जनवादी क्रान्ति सम्पन्न नहुँदासम्म र विश्वमा महान् सर्वहारा सांस्कृतिक क्रान्तिको औचित्यता कायम रहँदासम्म जीवितै रहने छन्’ डा. आचार्यले त्यसका पछाडिको कारण खोतल्दै भन्नुभयो– ‘मिश्रलाई प्रगतिवादी धारमा डोर्याउने यिनै दुई वटा परिघटना हुन् ।’
साहित्यकार मिश्र विशुद्ध साहित्यकार मात्र नभएर राजनीतिकर्मी पनि भएको उहाँको तर्क थियो ।
‘उहाँले हलीगोठाला, महिला, प्रवासीसहित सर्वहारा पङ्क्तिको पक्षमा साहित्य सृजना गर्नुभयो’ उहाँले भन्नुभयो– ‘मिश्र त्यतिमा मात्र सीमित रहनुभएन, नेपाल कम्युनिस्ट आन्दोलनमा महत्त्वपूर्ण हस्ती पुष्पलालसँगै उहाँ नयाँ जनवादी क्रान्तिको राजनीतिमा समेत आजीवन सँगसँगै हिँड्नुभयो ।’
उहाँले मिश्रका खण्डकाव्यको तुलनामा फुटकर कविता सशक्त रहेको बताउनुभयो ।
मिश्रका कविता धारिलो भएको बताउँदै उहाँले त्यस खालको तिखो कवि अहिलेसम्म नेपाली साहित्यमा देखा नपरेको धारणा व्यक्त गर्नुभयो ।
कवि मिश्रको कविता अहिले पनि त्यत्तिकै सान्दर्भिक रहेको बताउँदै उहाँले भन्नुभयो– ‘प्रतिक्रियावादी व्यवस्थाका विरुद्ध धारिलो कविता लेख्न मिश्रका साहित्यले हामीलाई अहिलेसम्म पनि प्रेरणा दिइरहेका छन् ।’
नेकपा (मसाल) का प्रवक्ता तथा प्रगतिवादी साहित्यकार रामप्रकाश पुरीको प्रमुख आतिथ्यतामा सम्पन्न उक्त कार्यक्रममा कविता र गजल वाचन पनि गरिएको थियो ।
कार्यक्रममा गिरीप्रसाद बुढाले ‘पार्टी फुटेको दिन’, ऋतु केसीले ‘ए साथी ! फर्केर आऊ’, समष्टि बुढाले ‘म देशको कृषक’, सुभाष जिसीले ‘मलाई सन्किन मन लागेको छ’, बाबुराम आचार्यले ‘साल साल बेहाल’, प्रकाश थापामगरले ‘बच्चामाकुरा’, हरिलाल महतराले ‘तिम्रो सङ्घीयतामा’ र खिमराज चालिसेले ‘मेरो घर’ शीर्षकको कविता वाचन गर्नुभएको थियो भने रगवीर विश्वकर्माले गजल वाचन गर्नुभएको थियो ।
कार्यक्रमको सञ्चालन अन्पाका सचिव गिरीप्रसाद बुढाले गर्नुभएको थियो ।
