गणेश अधिकारी,पोखरा ।
राष्ट्रिय जनमोर्चा कास्कीले संसद पुनस्र्थापना, सङ्घीयताको खारेजी र भ्रष्टाचारको अन्त्यको मूल नारासहित एकमहिने कार्यक्रमको उद्घाटन आज पोखराको पृथ्वीचोकमा विरोध कार्यक्रम गरी सुरु गरेको छ ।
कार्यक्रमको उद्घाटन प्रमुख अतिथि राजमो गण्डकी प्रदेश अध्यक्ष शङ्कर बरालले गर्नुभएको थियो । सो अवसरमा मन्तव्य राख्दै प्रमुख अतिथिले वर्तमान अवस्थामा जनता सचेत नहुने हो भने अहिलेसम्मको आन्दोलनबाट प्राप्त उपलब्धि खेर जान सक्ने देश अस्थिरताको भुमरीमा फस्ने र अन्तमा विदेशी शक्तिको रणभूमि बन्ने खतरा रहेको बताउनुभयो ।
नेकपा (मसाल) कास्की प्रवक्ता चन्द्रबहादुर केसी, अखिल (छैठौं) का केन्द्रीय उपाध्यक्ष गणेश अधिकारी, अखिल नेपाल टे«ड युनियन महासङ्घ (अन्टुक) केन्द्रीय सदस्य रामबहादुर बाठामगर, अखिल नेपाल किसान महासङ्घ (अप्फा) का जिल्लाध्यक्ष गङ्गबहादुर थापा,अखिल नेपाल महिला सङ्घकी जिल्लाध्यक्ष जमुना केसी र जनजाति नेता टमबहादुर रोक्का मगरलगायतका नेताहरूले सम्बोधन गर्नुभएको थियो ।
कार्यक्रमको सञ्चालन राष्ट्रिय जनमोर्चाका जिल्ला सहसचिव बिक्रम थापाले गर्नुभएको थियो भने कार्यक्रमको अध्यक्षता जिल्लाध्यक्ष रविमोहन ढकालले गर्नुभएको थियो । राजमो कास्कीले दिएको जानकारीअनुसार आजबाट एकमहिने कार्यक्रमको सुरुवात भएको र कास्की जिल्लाभरि नै सङ्घर्षको कार्यक्रम निश्चित गरिएका छन् ।
जसअनुसार माघ २ गते लेखनाथको तालचोकमा, माघ ३ गते रामबजारमा, ९ गते बगरमा, १० गते बिरौटामा, १३ गते हल्लनचोक लेक साइडमा, १६ गते हेम्जा मिलनचोकमा, २० गते अन्नपूर्ण गाउँपालिका बिरेठाँटीमा, २३ गते रुपागाउँ पालिकाको देउरालीमा, २८ गते माछापुच्छ्रे गाउँपलिकाको लाहचोक कार्यक्रम गर्ने तय भएको छ ।
