काठमाडौं । ३३ किलो सुन आयात भएर गायब भएको त्रिभुवन विमानस्थलबाट सुन तस्करी कायमै रहेको पाइएको छ । पछिल्लो समय तस्करहरुले विदेशबाट नेपालीलाई कमिसनमा सानो सानो परिमाणमा सुन पठाउने र यहाँ संकलन गर्ने गरेको पाइएको छ ।
यसै क्रममा विमानस्थलबाट अवैध सुनको दुई थान बाला र र स्रोत नखुलेको आठ लाख ७७ हजार नगदसहित दुई जना पक्राउ परेका छन् । पक्राउ पर्नेमा नुवाकोटको शिवपुरी गाउँपालिका–४ का ४० वर्षीय प्रलाद थापा र धादिङको ज्वालामुखी गाउँपालिका–३ स्थायी वतन भएका वर्ष ४२ का अर्जुन प्रसाद थपलिया रहेका छन् ।
विमानस्थलको आगमनतर्फको नयाँ पार्किङ एरियामा चेकजाँचका क्रममा उनीहरुसँग सुना र नगद फेला परेको हो ।
प्रलाद थापासँग अवैध रुपमा संकलन गरी लैजान लागेको अवस्थामा सुनको बाला थान–१ (५० ग्राम) र उनले बोकेको व्यागभित्र श्रोत नखुलेको नेपाली रुपैयाँ जम्मा चार लाख ३७ हजार फेला परेको थियो भने थपलियाको साथबाट सुनको बाला थान–१ (५० ग्राम) र श्रोत नखुलेको नगद चार लाख ४० हजार फेला परेको प्रहरीले जनाएको छ ।
पक्राउ परेका उनीहरुलाई आवश्यक अनुसन्धान एवम् कारबाहीको लागि बरामद सुनको बाला र नेपाली रुपैयाँसहित राजश्व अनुसन्धान विभाग पुल्चोक पठाइएको छ ।
