काठमाडौं । सत्तारुढ दल नेपाल कम्युनिष्ट पार्टी (नेकपा) विभाजनको असर प्रदेश तहमा सर्दै प्रदेश नम्बर १ मा पुगेको छ । प्रदेश १ का मुख्यमन्त्री शेरधन राईविरुद्ध नेकपा (प्रचण्ड–नेपाल) समूहले आज (आइतबार) अविश्वासको प्रस्ताव दर्ता गरिएको छ ।
नयाँ मुख्यमन्त्रीका रूपमा नेकपाका स्थायी कमिटी सदस्य भीम आचार्यको नाम प्रस्तावित गरिएको छ ।
शनिबार साँझ मुख्यमन्त्री राईले अविश्वास प्रस्ताव ल्याउने तयारी गरेको भन्दै प्रदेश सरकारका आर्थिक मामिला तथा योजनामन्त्री इन्द्र आङ्बोलाई बर्खास्त गर्नुभएको थियो ।
त्यसलगत्तै आइतबार बिहान प्रदेश सरकारका ३ मन्त्रीले राजीनामा दिएका छन् । सामाजिक विकासमन्त्री जीवन घिमिरे, सामाजिक विकास राज्यमन्त्री जसमाया गजमेर र उद्योग, पर्यटन, वन तथा वातावरण राज्यमन्त्री विजय विश्वासले राजीनामा दिनुभएको हो ।
अविश्वास प्रस्तावमा प्रचण्ड–नेपाल समूहका ४४ सभासदको समर्थन छ । प्रस्ताव पारित गराउन भने ४७ मत आवश्यक पर्छ ।
प्रदेश १ सभामा रहेका ९३ सदस्यमा नेकपाका ६७, कांग्रेसका २१, जनता समाजवादी पार्टीका ३, राष्ट्रिय प्रजातन्त्र पार्टी र संघीय लोकतान्त्रिक राष्ट्रिय मञ्चका १/१ जना सांसद छन् ।
यो पनि :
प्रदेश संसदमा ओलीको कदमविरुद्ध उभिने शक्तिलाई राजमोले समर्थन गर्ने
सातमध्ये पाँचवटा प्रदेश सरकार डगमग, कुन प्रदेशमा कस्तो अवस्था ?
