गाईघाट । तेजपातका मूल्यमा बिचौलियाले गरेको चलखेलको कारण उदयपुरका किसानले मूल्य पाएका छैनन् ।
जिल्लाभित्र र बाहिरका बिचौलिया आएर तेजपातको मूल्य निर्धारण गर्दा किसानले उचित मूल्य नपाएको बताइएको छ । स्थानीय बजारका विचौलिया गाउँमा प्रवेश गरेर मूल्य निर्धारण गर्ने र सस्तोमा बिक्री गर्न बाध्य बनाउने गरिएको बताइएको छ ।
प्रतिकिलो २५ देखि ४० रुपियाभन्दा बढीमा बिक्री हुन नसक्दा आफूहरू समस्यामा परेको रौतामाई गाउँपालिका–१ मुर्कुचीका दिव्यराज बुर्जामगरले जानकारी दिए ।
उनी भन्छन्– “दश वर्षदेखि आफूहरूले २५ देखि ४० रुपियाँ प्रतिकिलो बिक्री गरेको तेजपात अहिले पनि बिचौलियाको कारण उही मूल्यमा बिक्री गर्न बाध्य हुनुपरेको छ ।”
उनीहरूले बाहिरका व्यापारीलाई प्रतिकेजी ६० देखि ७० रुपियाँभन्दा बढीमा तेजपात बिक्री गर्ने गरेको रौतामाई–४ मलबासेका किसान रत्नबहादुर मगरातीले जानकारी दिए ।
स्थानीय तहका जनप्रतिनिधि तथा उद्योग वाणिज्य सङ्घले तेजपातको मूल्यवृद्धिमा उचित चासो नदिँदा बढी ठगिनुपर्ने र मर्कामा पर्नुपर्ने अवस्था रहेको कटारी–७ हर्देनीका किसान शेषराज खत्री बताउँछन् ।
जिल्लामा दश हजार हेक्टर क्षेत्रफलमा तेजपात खेती हुँदै आएको छ भने वार्षिक छ लाख केजी तेजपातसमेत उत्पादन हुने डिभिजन वन कार्यालयका सहायक वन अधिकृत जागेश्वर साहले जानकारी दिए ।
जिल्लामा वार्षिक आठदेखि दश करोडसम्मको तेजपातको बिक्री तथा कारोवार हुँदै आएको छ । प्रदेश नम्बर १ मा सबैभन्दा बढी यस जिल्लामा तेजपात उत्पादन हुने गर्दछ ।
