मोहनविक्रम सिंह ।।
(२०७७ मङ्सिर २२ गते काठमाडौँमा “गणतन्त्र, राष्ट्रियता र धर्म निरपेक्षताको रक्षा गरौँ, सङ्घीयता र भ्रष्टाचारको विरोध गरौँ” भन्ने विषयमा राष्ट्रिय जनमोर्चाका तर्फबाट हुन थालिरहेको भर्चुअल अन्तरक्रिया कार्यक्रममा प्रस्तुत मन्तव्य)
यो कार्यक्रमका अध्यक्ष तथा आदरणीय अतिथि र सहभागी साथीहरू,
१. आज राष्ट्रिय जनमोर्चाको आजोजनामा “गणतन्त्र, राष्ट्रियता र धर्म निरपेक्षताको रक्षा गरौँ, सङ्घीयता र भ्रष्टाचारको विरोध गरौँ” भन्ने नाराअन्तर्गत हुन थालिरहेको यो अन्तरक्रिया कार्यक्रममा उपस्थित सबै अतिथि र सहभागीलाई हामीले नेपाल कम्युनिस्ट पार्टी (मसाल) को तर्फबाट अभिनन्दन गर्न चाहन्छौँ ।
२. देशमा सामान्यतः करिब पुगनपुग एक शताब्दी लामो जनताको सङ्घर्ष, त्याग र बलिदान तथा मुख्यतः २०६२–६३ को महान् जनआन्दोलनको परिणामस्वरूप नै गणतन्त्रको स्थापना भएको हो । आज त्यो गणतन्त्रलाई समाप्त गर्नका लागि प्रतिगामीहरू उठ्न थालिरहेका छन् । यदि प्रतिगामी शक्तिहरू आफ्नो उद्देश्यमा सफल भए भने देश प्रतिगनतिर जाने छ; र, आजका उपलब्धि पुनः प्राप्त गर्नका लागि हामीले लामो सङ्घर्ष गर्नुपर्ने छ । त्यो अवस्थामा गणतन्त्रको रक्षा गर्नु आज ऐतिहासिक र राष्ट्रिय आवश्यकता भएको छ ।
३. आज प्रतिगामी शक्तिहरूले राजतन्त्रको पुनस्र्थापनाका लागि पूरा शक्ति लगाइरहेको भए पनि अन्ततः उनीहरूको उद्देश्य सफल हुने छैन भन्ने कुरामा हामीलाई पूरा विश्वास छ । यदि उनीहरूले अस्थायी रूपले त्यसका लागि केही सफलता प्राप्त गर्छन् भने पनि त्यसको परिणामस्वरूप उनीहरूले झन् ठुलो क्षति उठाउनुपर्ने छ । स्वयम् नेपालको इतिहासबाट पनि यो कुरा प्रष्ट भइसकेको छ कि प्रतिगामी शक्तिहरूले कुनै खास अवस्थामा केही सफलता प्राप्त गरे पनि अन्तमा उनीहरूले झन् ठुलो क्षति उठाउनुपर्दछ । २०१७ सालको काण्डपछि उनीहरू ३ दशकसम्म सत्तामा टिक्न सफल भएका थिए, तर २०५९ को काण्डपछि उनीहरूको सत्ता करिब ३ सालमा नै समाप्त भएको थियो; र, राजतन्त्रको अन्त्यसहित उनीहरूले झन् ठुलो क्षति उठाउनुपरेको थियो । त्यसैले अहिले उनीहरूले केही सफलता प्राप्त गर्न सके भने पनि त्यो एकदम अल्पअवधिका लागि हुने छ; र, प्रतिगामी शक्तिहरू झन् बढारिएर जाने छन् । अन्तमा, जित प्रतिगामी शक्तिको होइन, गणतन्त्र पक्षधर शक्तिको नै हुने छ भन्ने कुरामा हामीलाई पूरा विश्वास छ ।
४. हामी यो कुरामा स्पष्ट छौँ कि आज देशमा कायम भएको गणतन्त्र बुर्जुवा प्रकारको हो; र, त्यसद्वारा जनताका आधारभूत आवश्यकताको समाधान सम्भव छैन । त्यसका लागि नयाँ जनवादी गणतन्त्रको स्थापना आवश्यक छ । त्यसका लागि परिस्थिति तयार पार्नका लागि हामीले लगातार प्रयत्न गर्दै जानुपर्दछ । त्यो हाम्रो आजको आधारभूत र रणनीतिक कार्य हो र त्यो लक्ष्य लामो क्रान्तिकारी सङ्घर्षपछि नै सम्भव हुन सक्ने छ । तर तत्कालका लागि अहिले देशमा कायम भएको गणतन्त्रले पनि प्रगतिशील महत्त्व राख्दछ; र, त्यो उपलब्धिको रक्षा गर्नु सम्पूर्ण जनताको दायित्व हुन्छ ।
५. आज देशको राष्ट्रियताका अगाडि पनि गम्भिर प्रकारको खतरा छ । भारतीय साम्राज्यवादले कालापानीमा त पहिलेदेखि नै कब्जा गरेर त्यहाँ आफ्नो सेना राखेको थियो । अब त्यसले त्यो भूमिलाई आफ्नो देशको नक्सामा सामेल गरेर त्यो सम्पूर्ण भूमि आफ्नो देशको नै भएको भनेर दावी गर्न थालिरहेको छ । त्यसले तराईको विखण्डनका लागि पनि पृथकतावादीहरूलाई प्रोत्साहित गर्ने काम गरिरहेको छ । नेपालका कैयौँ सीमामा त्यसले अतिक्रमण गरेको छ । त्यो अवस्थामा राष्ट्रियता रक्षाको प्रश्न पनि हाम्रो देशका लागि अत्यन्त गम्भीर समस्या भएको छ ।
६. नेपाल बहुजातीय, बहुसांस्कृतिक, बहुभाषिक र बहुधार्मिक देश हो । त्यो अवस्थामा कुनै एउटा धर्मलाई राज्यको धर्म बनाउनु सही हँुदैन । त्यसैले पहिले निरङ्कुश राजतन्त्रअन्तर्गत नेपाललाई हिन्दु राष्ट्र बनाउने सोचाइ प्रतिक्रियावादी सोचाइ थियो । हामीले हिन्दुसहित सबै धर्मालम्बीको धार्मिक स्वतन्त्रतालाई समर्थन गर्दछौँ । धर्म निरपेक्षताको सोचाइले नेपालको बहुजातीय, बहुसांस्कृतिक र बहुधार्मिक राष्ट्रिय चरित्रसँग मेल खान्छ । नेपालको संविधान–२०७२ ले धर्म निरपेक्षताको सिद्धान्तलाई स्वीकार गरेको छ र हामीले त्यसलाई स्वागत गरेका छौँ ।
७. अहिले प्रतिगामी शक्तिहरूले नेपाललाई हिन्दु राष्ट्र बनाउनुपर्ने माग गर्न थालिरहेका छन् । उनीहरूको त्यो माग खालि धर्म निरपेक्षताको सिद्धान्त र नेपालको बहुधार्मिक चरित्रका विरुद्ध मात्र छैन, स्वयम् त्यसले हिन्दुहरूको धार्मिक भावनाको पनि प्रतिनिधित्व गर्दैन । वास्तवमा प्रतिगामी शक्तिहरूले राजतन्त्रको पुनस्र्थापना प्रतिगामी उद्देश्य पूरा गर्न नै हिन्दु धर्मलाई हतियारको रूपमा प्रयोग गर्न प्रयत्न गरिरहेका छन् । त्यसकारण हामीले त्यस प्रकारको मागको कडा विरोध गर्नुपर्दछ ।
८. हामीले पहिलेदेखि नै स्पष्ट गर्दै आएका थियौँ– सङ्घीयता हाम्रो देशको सानो आकार, भूराजनीतिक स्थिति वा पिछडिएको अर्थतन्त्रका लागि उपयुक्त छैन । त्यसले जाति र क्षेत्रीय विग्रह र राष्ट्रिय विखण्डनको स्थितिको सिर्जना गर्दछ । त्यसमा लाग्ने अत्यधिक र अनावश्यक खर्चका कारणले जनतामा करको वृद्धि हुन्छ, विकास कुण्ठित हुन्छ; र, स्थानीय निकायको अधिकारको हनन हुन्छ । छोटो समयमा पनि त्यसको अभ्यासबाट त्यो कुरा व्यावहारिक रूपले नै प्रमाणित हुँदै गएको छ । त्यसकारण हाम्रो पार्टीले सङ्घीयता वा त्यसको प्रादेशिक संरचनालाई खारेज गर्नुपर्ने आवश्यकतामा जोड दिदैँ आएको छ; र, अहिले पनि दिन्छ ।
९. आज देशमा भ्रष्टाचार व्यापक रूपले बढ्दै गएको छ । त्यसबाट सम्पूर्ण प्रशासन, विकास कार्य, सार्वजनिक सेवा र जनजीवनसमेत नराम्ररी प्रभावित भएको छ । वर्तमान सरकारले त्यस प्रकारको भ्रष्टाचारको छानबिन गर्न र त्यसलाई नियन्त्रण गर्नुको सट्टा, त्यसलाई सरक्षण गर्ने नीति नै अपनाइरहेको छ । सरकारको त्यस प्रकारको नीति र कार्यप्रणालीप्रति हाम्रो पार्टीले गम्भीर चिन्ता र क्षोभ प्रकट गर्दछ; र, भ्रष्टाचार विरुद्धको सङ्घर्षमा विशेष जोड दिन्छ ।
१०. उपर्युक्त प्रकारको पृष्ठभूमिमा नै हाम्रो पार्टीले गणतन्त्र, राष्ट्रियता र धर्म निरपेक्षताको रक्षा तथा सङ्घीयता र भ्रष्टाचारका विरुद्धको सङ्घर्षलाई अगाडि बढाउने निर्णय गरेको छ । त्यसैले त्यस विषयमा अहिले राष्ट्रिय जनमोर्चाले गर्न थालेको यो अन्तरक्रिया कार्यक्रमलाई पनि हाम्रो पार्टीले स्वागत गर्दछ । हामीले उक्त विषयमा राष्ट्रिय जनमोर्चा वा अन्य कुनै सङ्गठनले गर्ने कुनै पनि कार्यक्रम वा सङ्घर्षलाई समर्थन गर्ने छौँ; र, तिनीहरूसित ऐक्यबद्धता प्रकट गर्नेछौँ । धन्यवाद !
