तिलक सुवेदी, नवलपरासी ।
राष्ट्रिय जनमोर्चा नवलपरासीको आयोजनामा जिल्लाको सुनवल नगरपालिकाको सुनवल चोकमा संघीयताको खारेजीको माग गर्दै विरोध सभाको आयोजना गरिएको छ ।
कार्यक्रमलाई सम्बोधन गर्दै रक्तिम सांस्कृतिक अभियानका अध्यक्ष रेम रानाले मुलुकमा दुई तिहाई प्राप्त कम्युनिस्ट नामधारि सरकारले आर्थिक अभाव देखाएर कोरोना महामारिमा जनताको मौलिक हक स्वास्थ्य उपचार नगरेको आरोप लगाउनुभयो ।
उहाँले संघीयता खारेज गरेर प्रदेश सरकारको अनावश्यक खर्च रकम कटौती गरी जनतालाई कोरोनाको महामारी बाट जनतालाई जोगाउनुपर्ने बताउनुभयो ।
यस्तो गम्भीर परिस्थितिमा पनि नेकपा का नेताहरु सार्वजनिक चासोका विषयमा भन्दापनि व्यक्तिगत महत्वाकांक्षा परिपुर्तिका लागि छिनाझपटी गर्नु गलत भएको उल्लेख गर्नुभयो ।
संघीयताको खारेजी तथा कोभिड १९ को उपचारमा सरकारले देखाएको उदासीनता र मौलाउँदो भ्रष्टाचारको विरुद्धमा देशब्यापी विरोध कार्यक्रम अन्तर्गत नवलपरासीमा राजमोले विरोध सभाको आयोजना गरेको हो ।
राजमो जिल्ला सल्लाहकार तिलकप्रसाद सुवेदीको सञ्चालन र जिल्ला अध्यक्ष किसनबहादुर अधिकारीको अध्यक्षतामा भएको उक्त विरोध सभामा नेकपा (मसाल) नवलपरासी जिल्ला प्रवक्ता धनपति सापकोटाले पनि सम्बोधन गर्नुभएको थियो ।
कार्यक्रममा नेकपा (मसाल) जिन्दावाद, राष्ट्रिय जनमोर्चा जिन्दावाद, भारतीय साम्राज्यवाद मुर्दावाद, संघीयता चाहिँदैन देश टुक्रयाउन पाइँदैन, संघीयता खारेज गर, भ्रस्टाचार नियन्त्रण गर, भ्रष्टाचारीलाई कार्वाही गर, लिपुलेक, लिम्पियाधुरा, कालापानी हाम्रो हो, शिक्षा, स्वास्थको ग्यारेन्टी गर लगायतका नारा लगाइएको थियो ।
