काठमाडौँ । उपल्लो खिम्ती र अपरखिम्तीबाट १९ मेगावाट विद्युत उत्पादन हुने भएको छ ।
दोलखा र रामेछापको सीमा भएर बग्ने खिम्तीखोलामा निर्माणाधीन १२ मेगावाट उपल्लो खिम्ती पहिलो र सात मेगावाट अपरखिम्ती दोस्रो गरी कुल १९ मेगावाट विद्युत उत्पादन हुन लागेका हुन् ।
हिमालय उर्जा विकास कम्पनीले निर्माण गरेको दुवै आयोजनको सम्पूर्ण काम सकिएको र उपकरण जडान गर्ने काम अन्तिम चरणमा पुगेकाले विद्युत उत्पादन सुरु हुने आयोजनका मेकानिकल इञ्जिनियर अमित सिंहले बताउनुभयो ।
पहिलो आयोजनमा विद्युत् उपकरणको काम यसै हप्ता अन्तिम चरणमा पुग्ने र दोस्रो आयोजनको पेनस्टक पाइपको काम अन्तिम चरणमा भएकाले मङ्सिरको अन्तिमसम्म आयोजनाले विद्युत उत्पादन सुरु गर्ने लक्ष्य लिएको उहाँले जानकारी दिनुभयो ।
यस कम्पनीले दुई वर्षअघि नै रु. २४ करोड ७५ लाख बराबरको साधारण सेयर जारी गरिसकेको छ । दोलखा जिल्ला र रामेछापको सीमा भएर बग्ने खोलालाई फर्काएर रामेछापको चुचुरेमा विद्युतगृह निर्माण गरिएका छन् ।
आयोजनको निर्माण र प्रसारणबाट दोलखा जिल्लाका साविकका माली, श्यामा, जिरी, हावा च्यामा र सहरे गाविस प्रभावित हुने छ भने रामेछापको चुचुरे, ठोेसे, रस्नालु, बेताली गाविस प्रभावित हुने छ । कुल रु. तीन अर्ब १५ करोड लागत अनुमान गरिएको यी आयोजनामा नबिल बैङ्क, नेपाल बैङ्क, एभरेष्ट बैङ्क र एस डेभलपमेन्ट बैङ्कको रु. दुई अर्ब ३५ करोड ऋण लगानी रहेको छ ।
हिमालय उर्जा कम्पनीले निर्माण गरेको आयोजनाले २०७५ असार मसान्तसम्ममा विद्युत् उत्पादन गर्ने लक्ष्य लिएको भएता पनि प्रसारण लाइन अभावमा दुई वर्ष ढिला भएको आयोजनाको भनाइ छ । आयोजनाबाट निर्माणाधीन विद्युत् गर्जाङमा निर्माणाधीन सबस्टेसनमा जोडिने छ ।
अर्का खिम्ती गर्जाङ १३२ केभीको प्रसारण लाइन निर्माणाधीन छ । नेपाल विद्युत् प्राधिकरणले निर्माण गरिरहेको प्रसारण लाइनको काम ढिलासुस्ती भएर समयमा नहुने भएमा विकल्पमा कम्पनीको उच्च ध्यान गई छलफल गरिने इञ्जिनियर सिंहले बताउनुभयो ।
प्रसारण लाइनको काममा ढिलासुस्ती भएमा दैनिक उत्पादित विद्युत खेर गई आम्दानीबाट करोडौँको घाटा हुने भएकाले आयोजनाको व्यवस्थापनको विकल्प खोज्नुपर्ने बाध्यता रहेको उहाँले बताउनुभयो । आयोजनाका विद्युतगृहमा जापानी तोसिबा कम्पनीको उपकरण जडान गरिएको छ । उपकरण जडानमा भारतीय प्राविधिकको टोलीले काम गर्दै आएका छन् ।
