काठमाडौँ । बागमती प्रदेशमा नै किसानको मागअनुसार गहुँको बिउ अभाव देखिएको छ । कृषि सामग्री कम्पनी लिमिटेड प्रादेशिक कार्यालय हेटौँडाले किसानको मागअनुसार गहुँको बीउ उपलब्ध गराउन नसकेको देखिएको हो ।
लिमिटेडको गोदाममा पर्याप्त मात्रामा गहुँको बिउ भण्डारण नहुँदा किसानलाई मागअनुसार बिउ उपलब्ध गराउन नसकिएको लिमिटेडका कार्यालय प्रमुख लक्ष्मण यादवले जानकारी दिनुभयो । कार्यालयका अनुसार चालु आव २०७७/७८ मा करिब दुई हजार ५०० मेट्रिक टन गहुँका बिउको माग भए पनि कार्यालयबाट करिब एक हजार ६१२ मेट्रिक टन मात्र बिउ उपलब्ध गराउने लक्ष्य रहेको छ ।
कार्यालयको कार्य क्षेत्रअन्तर्गत यस आव २०७७/७८ मा बागमती प्रदेशको मकवानपुर, चितवन र काठमाडौँ तथा प्रदेश नं २ को बारा, पर्सा र रौतहट जिल्लामा गहुँको बिउ उपलब्ध गराउने योजना छ तर सम्बन्धित कृषि सामग्री कम्पनी लिमिटेडको सिफारिसका आधारमा अन्य जिल्लामा समेत गहुँको बिउ उपलब्ध गराउँदै आएको कार्यालयको भनाइ छ ।
कार्यालयले ती जिल्लाका विभिन्न सहकारी संस्था र निजी बिउबिजन बिक्री गर्ने आपूर्तिकर्तामार्फत गहुँको बिउ बिक्री गर्दै आएको छ । गहुँको जात वा बालीमा भृकुटी, विजय, एनएल ९७१ र गौतम आदि पर्दछन् ।
किसानको मागअनुसार कम्पनीले गहुँको बीउ पर्याप्त मात्रामा उपलब्ध गराउन नसकेको कार्यालयमा गहुँको बिउ खरिदका लागि आउनुभएका सर्लाही कवलासी निवासी कवलासीस्थित कृषि सहकारी संस्था लिमिटेडका अध्यक्ष उपेन्द्र यादवले बताउनुभयो ।
कार्यालयका अनुसार प्रत्येक वर्ष किसानको मागअनुसार गहुँको बिउ पूर्ण रूपमा उपलब्ध गराउन सकेको छैन । किसानसँग वैशाख महिनासम्म खरिद गरी राखेको गहुँको बिउलाई कम्पनीले प्रशोधनपश्चात बिक्री वितरण गर्ने गर्दछ । कार्यालयले किसानसँग गहुँको बिउको गुणस्तरको अवस्था हेरी प्रतिकेजी रु. ३५ देखि ४० सम्ममा प्रत्येक वर्षको वैशाख महिनासम्ममा खरिद गरेको बिउलाई हाल प्रतिकेजी रु ६५ मा सहकारी संस्था र निजी बिउबिजन बिक्री गर्ने आपूर्तिकर्तालाई बिक्री गर्दै आएको छ ।
प्रायःजसो हरेक वर्ष वैशाख महिनासम्ममा कार्यालयले किसानसँग गहुँको बिउ खरिद गरी सुरक्षित भण्डारण गरेर राख्ने गर्दछ । त्यसपछि कार्यालयले उचित प्रशोधन गरी हरेक कात्तिक महिनादेखि मङ्सिर महिनासम्म सहकारी संस्था र निजी बीउबिजन बिक्री गर्ने आपूर्तिकर्तामार्फत गहुँको बिउ बिक्री गर्ने गर्दछ ।
यस वर्ष बागमती प्रदेशको मकवानपुर, चितवन र काठमाडौँ तथा प्रदेश नं २ को बारा, पर्सा र रौतहटसहित अन्य विभिन्न जिल्लामा मागअनुसारको गहुँको बिउ उपलब्ध गराउने लक्ष्य रहेको कार्यालयले जनाएको छ ।
हरेक वर्षको कात्तिक महिनादेखि पुसको पहिलो सातासम्म गहुँ छर्न उपयुक्त समय मानिन्छ । यस वर्ष बिक्री गर्ने लक्ष्य लिएको करिब एक हजार ५०० मेट्रिक टन गहुँको बीउबाट सो क्षेत्रमा करिब ३८ हजार पाँच हजार मेट्रिक टन गहुँ उत्पादन हुने अपेक्षा गरिएको छ ।
हेटौँडामा यसअगावै रहेको साविकको राष्ट्रिय बिउबिजन कम्पनी लिमिटेड र साविकको कृषि सामग्री संस्थानलाई समावेश गरी सङ्घीय संरचनाअनुसार कृषि सामग्री कम्पनी लिमिटेड प्रादेशिक कार्यालयको रूपमा स्थापना गरिएको थियो ।
