काठमाडौँ । पछिल्लो २४ घण्टामा देशभर १९ सय ४८ जनामा कोरोना सङ्क्रमण पुष्टि भएको छ । यससँगै देशभर कोरोना सङ्क्रमितको कुल सङ्ख्या दुई लाख २६ हजार २६ पुगेको स्वास्थ्य तथा जनसङ्ख्या मन्त्रालयले जनाएको छ ।
बुधबार मन्त्रालयका प्रवक्ता डा. जागेश्वर गौतमले चौबिस घण्टामा ३१ सय ४० जना सङ्क्रमणमुक्त रहेको पनि जानकारी दिए ।
यससँगै कोरोना निको हुनेको सङ्ख्या दुई लाख सात हजार ९९८ पुगेको छ । मन्त्रालयका अनुसार हाल देशभर सक्रिय सङ्क्रमित १६ हजार ६३९ जना रहेका छन् भने सङ्क्रमण मुक्त हुने दर ९२ प्रतिशत पुगेको छ ।
पछिल्लो २४ घण्टामा ९ हजार २१० जनाको पिसिआर परीक्षण भएको छ भने हालसम्म पिसिआर सङ्ख्या १६ लाख ९० हजार ५०९ पुगेको छ ।
यस्तै पछिल्ले २४ घण्टामा थप २८ जनाले ज्यान गुमाएसँगै कोरोनाबाट मृत्यु हुनेको कुल सङ्ख्या १३८९ पुगेको छ ।
स्वास्थ्य तथा जनसङ्ख्या मन्त्रालयले उपलब्ध गराएको अध्यावधिक विवरणअनुसार काठमाडौँ उपत्यकाका तीन जिल्ला काठमाडौँ, ललितपुर र भक्तपुर र कास्कीमा मात्रै ५०० भन्दा धेरै कोरोनाका सक्रिय सङ्क्रमित रहेका छन् ।
मन्त्रालयका अनुसार कास्कीमा ७५१ जना सक्रिय सङ्क्रमित रहेका छन् भने काठमाडौँमा ७ हजार ६६०, भक्तपुरमा ५८० र ललितपुरमा १ हजार ४९९ जना सक्रिय सङ्क्रमित रहेका छन् । हाल मनाङ, मुगु र डोल्पाबाहेक सबै जिल्लामा सक्रिय सङ्क्रमित रहे पनि ती जिल्लामा न्यून सङ्ख्यामा रहेका छन् ।
