काठमाडौं । गएको २४ घण्टामा नेपालमा एक हजार नौ सय ८० जना कोरोना भाइरसको संक्रमित थपिएका छन् । १० हजार ३८१ जनाको पीसीआर परीक्षण गर्दा एक हजार एक ९१ पुरुष र ७८९ जना महिला गरी सो संख्यामा संक्रमित थपिएका स्वास्थ्य तथा जनसंख्या मन्त्रालयले जनाएको छ ।
मन्त्रालयका अनुसार काठमाडौं उपत्यकामा एक हजार सात जना नयाँ संक्रमित थपिएका छन् । थपिएका संक्रमितमध्ये ५५३ जना पुरुष र ४५४ जना महिला रहेका छन् ।
यस्तै, सोमबार तीन हजार ४३ जना कोरोना संक्रमणमुक्त भएका छन् । यो सँगै नेपालमा कोरोना भाइरसको संक्रमणबाट निको हुनेको संख्या दुई लाख नाघेको छ । आजसम्म सन्चो हुनेको संख्या दुई लाख दुई हजार ६७ पुगेको मन्त्रालयले जनाएको छ । मन्त्रालयका अनुसार संक्रमणमुक्त हुने यो संख्या ९०.९ प्रतिशत हो ।
नेपालमा आजसम्म दुई लाख २२ हजार दुई सय ८८ जनामा कोरोना भाइरसको संक्रमण पुष्टि भएको छ । हाल सक्रिय संक्रमितको संख्या १८ हजार ४८४ रहेको छ ।
सोमबार थप १६ जनाको कोरोना संक्रमणका कारण मृत्यु भएको छ । यो सँगै हालसम्म एक हजार तीन सय ३७ जनाको मृत्यु भएको मन्त्रालयको तथ्यांकमा उल्लेख छ ।
