काठमाडौं । चन्द्रमा उत्पत्तिको अध्ययन गर्न चीनले पृथ्वीमा ढुंगा ल्याउने योजना बनाएको छ । चीनले सन् १९७० को दशकयता चन्द्रमाबाट ढुंगाका नमुना ल्याउन पहिलो पटक प्रयास गर्ने भएको बीबीसीले जनाएको छ ।
मंगलवार प्रक्षेपण गरिने मानवरहित चाङए–५ यानले चन्द्रमाबाट केही नमुना ल्याउने अपेक्षा गरिएको छ। ती ढुंगा चन्द्रमाको उत्पत्ति र निर्माणको अध्ययनका लागि उपयोगी हुने विश्वास गरिएको छ ।
अहिलेसम्म अमेरिका र सोभियत संघले मात्र चन्द्रमाबाट ढुंगाको नमुना पृथ्वीमा ल्याएका छन् । सन् १९७६ मा सोभियत संघले पठाएको लुना २४ ले अन्तिम पटक पृथ्वीमा त्यस्तो नमुना ल्याएको थियो ।
यदि अहिलेको योजना सफल भयो भने पृथ्वीमा चन्द्रमाको ढुंगा ल्याउने अमेरिका र तत्कालीन सोभियत संघपछि चीन तेस्रो देश हुनेछ ।
चाङए यानको नाम प्राचीन चिनियाँ चन्द्रदेवीको सम्मानमा राखिएको हो ।त्यसलाई लङ मार्च ५ नामक रकेटबाट प्रक्षेपण गरिनेछ ।
उक्त यानले चन्द्रमाको ‘ओशन अफ स्टोर्म्स’ भनिने अहिलेसम्म नपुगिएको स्थानबाट दुई किलोग्राम नमुना संकलन गर्ने प्रयास गर्नेछ। लङ मार्च रकेटले चीनको अन्तरिक्षयान चन्द्रमामा प्रक्षेपण गर्नेछ ।
सन् १९७६ को अभियानमा १७० ग्राम नमुना ल्याइएको थियो भने मानवसहितको एपोलो मिशनले ३८२ किलोग्राम ढुंगा र माटो ल्याएको थियो ।
चीन सन् २०१३ मा पहिलो पटक चन्द्रमामा पुगेको थियो।
