काठमाडौँ । पछिल्लो २४ घण्टामा देशभर थप १४ सय ७७ जनामा कोरोना सङ्क्रमित थपिँदै गर्दा २७ सय ९८ जना सङ्क्रमित कोरोनामुक्त भएका छन् ।
स्वास्थ्य तथा जनसङ्ख्या मन्त्रालयका अनुसार हाल सक्रिय सक्रमितको सङ्ख्या ३५ हजार १२५ छ ।
त्यस्तै, पछिल्लो २४ घण्टामा थप ६ जना सङ्क्रमितको मृत्यु भएको छ । यससँगै हालसम्म मृत्यु हुनेहरूको कुल सङ्ख्या १२ सय २१ पुगेको छ ।
देशभर ४१८ संक्रमित आइसियु र भेन्टिलेटरमा
मन्त्रालयले उपलब्ध गराएको तथ्याङ्कअनुसार पछिल्लो २४ घण्टामा चार सय १८ जना सङ्क्रमितलाई सघन कक्षमा राखी उपचार भइरहेको छ । आइसियुमा तीन सय ५४ र भेन्टिलेटरमा ६४ जना उपचारत छन् ।
गम्भीर बिरामी परेका सबैभन्दा बढी सङ्क्रमित बागमती प्रदेशमा १२० जना आइसियुमा, भेन्टिलेटरमा ३५ र होम आइसोलेसनमा १८ हजार ४८१ जना रहेका छन् ।
लुम्बिनी प्रदेशमा होम आइसोलेसनमा दुई हजार २०३ जना छन् । आइसियुमा ६४ र भेन्टिलेटरमा चार जना छन् ।
प्रदेश १ को होम आइसोलेसनमा तीन हजार ६५५, आइसियुमा ४५ र भेन्टिलेटरमा ११ संक्रमित छन्।
गण्डकी प्रदेशको होम आइसोलेसनमा एक हजार ८९५, आइसियुमा ९४ र भेन्टिलेटरमा १३ जना छन् ।
प्रदेश २ मा १६ सङ्क्रमित आइसियुमा र भेन्टिलेटरमा एक जना उपचाररत छन् । होम आइसोलेसनमा ८६० सङ्क्रमित छन् ।
कर्णाली प्रदेशमा होम आइसोलेसनमा बस्नेको सङ्ख्या २७० पुगेको छ । आइसियुमा १० जना उपचाररत छन्।
त्यसैगरी, सुदूरपश्चिममा होम आइसोलेसनमा बस्नेको सङ्ख्या एक हजार ८५ र आइसियुमा पाँच जना सङ्क्रमित उपचाररत छन् ।
