काठमाडौं । नेपालका करिब ४० लाख युवाहरु वैदेशिक रोजगारीमा गएको अनुमान छ । दैनिक सयौं युवाहरु विभिन्न देशमा रोजगारीका लागि जाने गर्दछन् । संसारभर छरिएर रहेका नेपाली युवाहरुमध्ये कतिपयको विभिन्न कारणले उतै मृत्यु भएको र रातो बाकसमा फर्किएका ह्रदयविदारक तस्बिरहरु त्रिभुवन अन्तर्राष्ट्रिय विमानस्थलमा दैनिक देखिन्छन् ।
परिवारको भरणपोषण गर्न विदेशिएका युवाहरुको अकालमै ज्यान जाँदा सम्बन्धित परिवारलाई पर्ने बज्रपात शब्दमा बर्णन गर्न सकिँदैन । पति, पुत्र वा पिता वियोगको पीडा भोग्नेलाई मात्र थाह हुन्छ । तैपनि समयले सबै घाउहरु पुरिँदै गएजस्तै त्यो पीडा पनि परिवारजनले बिस्तारै भुल्दै जान बाध्य हुन्छन् ।
तर, चेलीहरुका लागि भने आफ्ना माइतीसँगको बिछोडको पीडा कहिल्यै भुल्न नसक्नेगरी मुटुमा बिझिरहन्छ । जब तिहार आउँछ, अनि माइतीसँगको बिछोडको पीडाले झनै अत्याउँछ । दाजुभाइसँगको वियोगमा परेका चेलीलाई हरेक वर्ष भाइटिकाको दिन खल्लो र पीडादायी हुन्छ ।
रक्तिम सांस्कृतिक अभियान सुर्खेतले यही कथामा आधिरित ‘माइती’ नामक म्युजिक भिडियो सार्वजनिक गरेको छ । पुराना सर्जक राजु ढकालले सिर्जना गरेको यो गीत २०५५÷०५६ सालताका निकै चलेको थियो । सोही गीतलाई सर्जक हेमराज आश्रमको निर्देशनमा हालै म्युजिक भिडियोमार्फत बजारमा ल्याइएको हो ।
गीतको शब्द तथा संगीत राजु ढकालको छ भने स्वर रक्तिम सांस्कृतिक अभियान सुर्खेतकी उम्दा कलाकार मिरा थापाको रहेको छ । गीतमा अखिल (छैठौं) का केन्द्रीय सदस्य खगेन्द्रा विष्टको उत्कृष्ट अभिनय रहेको छ । अभिनयमा मिन राना, स्वनम लामा लगायत कलाकारले साथ दिएका छन् ।
आश्रम म्युजिकमार्फत सार्वजनिक गरिएको गीतको सम्पादन, नविन निरौला, क्यामेरा मधुर बस्नेत, ड्रोनमा सन्तोष र मेकअप शोभा श्रेष्ठको रहेको छ ।
