हेम बिजी

आकासजत्रै छाती
र, धर्तिजत्रै मन बनाएर
भर्खर भर्खर
सुम्सुमाइरहेका थिए देशवासीहरू
नयाँ चुच्चे नक्सा ।

महाकालीलाई अँगालो मार्दै
मुस्कुराइरहेका थिए
लिम्पियाधुरा, लिपुलेक र कालापानी
र, खुसीमा गद्गद् हुँदै
सोच्दै थिए देशवासीहरू
विशाल नेपाल
खोज्दै थिए पश्चिम किल्ला काँकडा
र, पूर्वमा टिष्टा ।

जब
सरकार प्रमुख
चुच्चे नक्सा बिनाको
दिँदै थिए दसैँ शुभकामना
तब
सियोले घोचेको बेलुनजस्तै
फुट्यो पट्ट
देशवासीको खुसी र सपना
र, एकै छिनमा हरायो
प्रिय चुच्चे नक्शा ।

भोलिपल्ट
कसैले सुचना टाँसेको थियो
हिजो
सिंहदरबारबाटै हरायो छ
चुच्चे नक्सा
फेला पार्नुहुने महानुभावहरूले
कृपया
नेपाली जनतालाई बुझाइदिनुहोला ।
सूचनापत्रकै तल
कसैले
अर्को सूचना टाँसेको थियो
सत्ता र कुर्चीसँग
साटिएको हुन सक्छ चुच्चे नक्सा ।
सायद
यति बेलासम्म
पुग्यो होला
छिमेकी देशको सिमानामा
त्यो चुच्चे नक्सा
त्यसैले
खोज्ने प्रयास नगर्नु होला कसैले ।