काठमाडौं । टर्कीमा एक तीन वर्षीय बालिकालाई भूकम्पले भत्काएको भवनको भग्नावशेषमा पुरिएको ६५ घण्टापछि जीवितै उद्धार गरिएको छ।

बीबीसीका अनुसार झन्डै तीन दिन भत्किएको घरमा पुरिएकी बालिकाको उद्धारलाई चमत्कार भनिएको छ।

शुक्रबार राति गएको शक्तिशाली भूकम्पका कारण ज्यान गुमाउनेको संख्या ४४ पुगेको छ । मृत्यु हुनेमा दुई जना ग्रिसका रहेको जनाइएको छ ।

भूकम्पका कारण अहिलेसम्म आठ सय जना घाइते भएको टर्कीको प्रकोप तथा विपद् व्यवस्थापन कार्यालयले जनाएको छ । कार्यालयका अनुसार अझै केही मानिस बेपत्ता छन् ।

टर्कीको इज्मिर सहरमा शुक्रबार ७ म्याग्निच्युडको भूकम्प गएको थियो । भूकम्पपछि भत्केका भवनहरूमा मानिसहरू फसेको आंशकामा खोजी तथा उद्धार कार्य भइरहेको जनाइएको छ  ।