काठमाडौं । अस्ट्रियाको राजधानी भिएनामा आतंकवादी हमला हुँदा दुई जना मारिएका छन् । १४ जना घाइते भएका त्यहाँको प्रहरीले जनाएको छ ।

घटनामा एकजना आक्रमणकारी पनि मारिएको बताइएको छ । राइफलसहित आएका व्यक्तिहरूले ६ वटा फरक स्थानमा गोली चलाउन थालेको प्रहरीले जनाएको छ ।

प्रहरी र आक्रमणकारीहरूबीच गोली हानाहान भएको अनलाइनमा पोस्ट गरिएको भिडिओमा देखिन्छ ।

एक हमलाकारी मारिएको र अर्का एकलाई पक्राउ गरिएको प्रहरीले जनाएको छ। कम्तीमा अर्का एकजना आक्रमणकारीको खोजी भइरहेको बताइएको छ। घाइतेमध्ये यहुदीहरूको प्रार्थनास्थल सिनागगको सुरक्षा गरिरहेका एक सुरक्षाकर्मी पनि रहेका छन् ।

सामाजिक सञ्जालमा राखिएको भिडिओ फूटेजमा गोली चलिरहँदा मानिसहरू भागिरहेको देखिन्छ । स्थानीय बासिन्दालाई सार्वजनिक ठाउँमा ननिस्किन र यातायात प्रयोग नगर्न भनिएको छ।