माधव खनाल, अर्घाखाँची ।
अखिल नेपाल महिला संघकी महासचिव सकुन्तला रानाले युवाहरूलाई स्वदेशमै रोजगारी दिन सकेमा देशले मुहार फेर्ने बताउनु भएको छ। बिहीवार अखिल नेपाल युवक संघ भूमिकास्थान नगरपालिकाको दोस्रो नगर भेलालाई सम्बोधन गर्दै रानाले सो कुरा बताउनुभएको हो । नेत्री रानाले वर्तमान सरकारले बलात्कारीलाई कार्वाही गर्नुको साटो संरक्षण गरेर राखेको आरोप समेत लगाउनु भयो ।
यस्तै नगर भेलालाई सम्बोधन गर्दै राष्ट्रिय जनमोर्चाका केन्द्रीय सदस्य झविलाल थापाले वर्तमान सरकारले कम्युनिस्टको खिल्ली उडाएको आरोप लगाउनुभयो । थप प्रसंगमा थापाले निर्वाचनको बेला जनतालाई झुठो आश्वासन दिइ अहिले जनतामाथि कुठाराघात गरेको आरोप लगाउनु भयो ।
भेलालाई सम्बोधन गर्दै राष्ट्रिय जनमोर्चाका पूर्व केन्द्रीय सदस्य सागर केसीले युवा भनेका देशको मेरुदण्ड हुन् भन्दै युवाहरूको जोस र जाँगरले गर्दा देशमा हालसम्म भएका आन्दोलनले सार्थकता पाएको बताउनुभयो ।
भेलालाई राष्ट्रिय जनमोर्चाका अर्घाखाँची जिल्ला सचिव बाबुराम सुनार, अखिल नेपाल युवक संघका केन्द्रीय सदस्य कुलराज खनाल, भूमिकास्थान नगरपालिका वडा नं ५ का अध्यक्ष तुल्सिराम वेल्बासे, अखिल नेपाल ट्रेड युनियन महाससंघ (अन्टुकका) लेखनाथ बन्जाडे, अखिल (छैठौं)का नेता टेकराज भुसाल लगायतले सम्बोधन गर्नुभएको थियो ।
भेलामा युएई नेपाली एकता समाजका प्रतिनिधि अजय केसी, अखिल नेपाल बुद्धिजिवी संघका थम्मन केसी, अखिल नेपाल शिक्षक संघ भूमिकास्थान नगर सचिव रामप्रसाद खनाल, भूमिकास्थान नगरपालिका वडा न १ का अध्यक्ष भोजराज खनाल लगायतको उपस्थिती रहेको थियो । राजु सुनारको अध्यक्षतामा भएको कार्यक्रमको स्वागत सुरेश आचार्य र सञ्चालन माधव खनालले गर्नुभएको थियो ।
