काठमाडौँ । प्रधान सेनापति पूर्णचन्द्र थापाको औपचारिक निमन्त्रणामा भारतीय सेनाध्यक्ष जनरल मनोज मुकुन्द नरवाणे कार्तिक १९ गते चार सदस्यीय भ्रमण दलका साथ नेपाल आउँदै छन् ।
तीन दिवसीय भ्रमणका दौरान जनरल नरवाणेले सैनिक मञ्चको वीर स्मारकमा श्रद्दाञ्जली अर्पण, जङ्गी अड्डामा सम्मान गारद निरीक्षण तथा आफ्ना समकक्षी महारथी पूर्णचन्द्र थापासँग छलफललगायत कमान्ड तथा स्टाफ कलेजका शिक्षार्थीहरूसँग अन्तरक्रिया गर्ने कार्यक्रम रहेको छ ।
भ्रमणको मुख्य अंशको रुपमा नेपाली सेना र भारतीय सेनाबिचको परम्परानुसार भारतीय सेनाध्यक्ष जनरल नरवाणेलाई सम्माननीय राष्ट्रपति श्रीमती विद्यादेवी भण्डारीले एक विशेष समारोहबिच नेपाली सेनाको मानार्थ महारथी दर्जा प्रदान गर्ने कार्यक्रम रहेको छ । नरवाणेले प्रधानमन्त्री तथा रक्षामन्त्रीसँग समेत औपचारिक भेटवार्ता गर्ने कार्यक्रम रहेको छ ।
नेपालले कालापानीलगायतका अतिक्रमित क्षेत्र समेटेर नयाँ नक्सा सार्वजनिक गरेपछि नरवाणेले नेपाल विरुद्ध आक्रामक अभिव्यक्ति दिएका थिए । उनले चीनको उक्साहटमा नेपालले कालापानी, लिपुलेक, लिम्पियाधुरालगायत क्षेत्रमाथि दाबी गरेको उनको भनाइ थियो । नेपाल विरुद्ध बोलेर विवादित बनेका नरवाणेलाई नेपाली सेनाको मानार्थ महारथी बनाउन लागिएको भन्दै त्यसको व्यापक आलोचना भइरहेको छ ।
