काठमाडौं । सत्तारुढ नेपाल कम्युनिष्ट पार्टी (नेकपा) का दुई अध्यक्षले दुई बेग्लाबेग्लै निर्देशन दिएका छन् । विवादित कर्णाली प्रदेश समितिका लागि लागि अध्यक्ष एवं प्रधानमन्त्री केपी शर्मा ओलीले दिएको निर्देशन विपरित कार्यकारी अध्यक्ष प्रचण्डले बेग्लै निर्देशन दिएका हुन् ।
कर्णाली प्रदेशका मुख्यमन्त्री महेन्द्रबहादुर शाहीका नाममा अध्यक्ष एवं प्रधानमन्त्री केपी शर्मा ओलीले कात्तिक ४ गते दिएको निर्देशन विपरित अर्का अध्यक्ष पुष्पकमल दाहाल प्रचण्डले शुक्रबार सर्कुलर पठाएर बेग्लै निर्देन दिएका हुन् ।
प्रधानमन्त्री एवं अध्यक्ष ओलीले मुख्यमन्त्री शाहीलाई दिएको निर्देशन सर्कुलरमा ‘प्रमुख सचेतक गुलावजंग शाहीमाथि तपाईंले गरेको कारबाही फिर्ता लिन र उहाँलाई पूर्ववत मुख्य सचेतकको जिम्मेवारीमा स्थापित गर्न निर्देशित गर्दछु’ भनिएको छ ।
तर, अर्का अध्यक्ष प्रचण्डले पठाएको सर्कुलरमा भने अविश्वासको प्रस्ताव र मुख्य सचेतकबारे प्रदेश कमिटिले नै निर्णय गर्ने भन्दै ‘हाम्रो दलको प्रदेशसभा सदस्यहरुको भावना र मर्म अनुसार कार्यान्वयन गर्न निर्देशित गर्दछु’ भनिएको छ ।
कर्णाली प्रदेशका मुख्यमन्त्री महेन्द्रबहादुर शाहीलाई पदबाट हटाउन नेकपाकै सांसदहरुले अविश्वासको प्रस्ताव दर्ता गराएपछि विवाद सतहमा आएको थियो । सुरुमा पूर्व एमाले एकजुट भएर अविश्वास प्रस्ताव ल्याएपनि पछि प्रचण्ड–नेपाल गुट मिलेपछि ओली गुट एक्लिएको थियो भने अविश्वासको प्रस्ताव असफल भएको थियो ।
त्यसपछि नेकपा संसदीय दलका नेता रहेका मुख्यमन्त्री शाहीले मुख्य सचेतक गुलावजंग शाहीलाई हटाएर सीता नेपालीलाई नियुक्त गरेका थिए ।
दुई अध्यक्षले बेग्लाबेग्लै निर्देशन दिएपनि नेकपाको कर्णाली प्रदेशले भने प्रचण्डको निर्देशन कार्यान्वयन गरेको छ । शुक्रबार बसेको प्रदेश सभाका बहुमत सदस्यहरुको बैठकले मुख्यमन्त्री विरुद्धको अविश्वासको प्रस्ताव खारेज गरेको छ भने संसदीय दलका नेता शाहीले नियुक्त गरेको मुख्य सचेतक र सचेतकलाई अनुमोदन गरेको छ ।
३३ सदस्यीय संसदीय दलको बैठकमा प्रधानमन्त्री ओली पक्षका सांसदहरुले बहिष्कार गरेपछि १८ जना सांसदहरुले बहुमतका आधारमा प्रचण्डको निर्देशन कार्यान्वयन गरेका हुन् ।
मुख्यमन्त्री शाहीविरुद्ध बहुमत सांसदले अविश्वास प्रस्ताव ल्याएपछि मुख्यमन्त्री शाहीले प्रमुख सचेतक शाहलाई बर्खास्त गर्दै सीता नेपालीलाई मुख्य सचेतक र कुर्मराज शाहीलाई सचेतक बनाएका थिए ।
