बागलुङ । बागलुङको पैयुथन्थापमा अखिल नेपाल युवक संघको प्रशिक्षण कार्यक्रम सम्पन्न भएको छ । लाम्सुमा आयोजित वडा नं ९ को वडास्तरीय प्रशिक्षण कार्यक्रममा अखिल नेपाल युवक संघका पूर्व केन्द्रीय अध्यक्ष तथा राष्ट्रिय जनमोर्चा राष्ट्रिय परिषद् सदस्य तिलक थापा, राजमो नेता तथा गण्डकी प्रदेश मामिला सभापति कृष्ण थापा, राजमो बागलुङका अध्यक्ष अमर थापा, उपाध्यक्ष धर्म कुँवर लगायत नेताहरुले प्रशिक्षण दिनु भएको थियो ।
त्यस क्रममा पूर्व अध्यक्ष थापाले दुई तिहाईको सरकारले पनि नेपाली युवाहरुलाई पहिचान गर्न नसकेको साथै हरेक क्षेत्रमा हुने भ्रष्टाचार, बलात्कार, महंगीका बिरुद्ध युवाहरु जुझारु प्रकारले आवाज उठाउनु पर्ने बताउँदै युवाहरु परिवर्तनको लागिलाई संगठित हुन आव्हान गर्नु भयो ।
कार्यक्रममा राष्ट्रिय जनमोर्चा जैमिनीका सदस्य होम बहादुर पुन, राष्ट्रिय जनमोर्चा पैयुथन्थापका सचिव मेघराज आचार्य, रक्तिमका केन्द्रीय कलाकार गिता थापा, जैमिनी ९ का जनप्रतिनिधि नवीन थापा, दिलिप थापा, शान्तकला शर्मा, बिस्नुकली दर्जी, स्थानीय समाजसेवी दिपेन्द्र थापा, टिकाराम शर्मा लगायतको आतित्थ्यता रहेको थियो ।
कार्यक्रम वडा समितिका अध्यक्ष वीर बहादुर थापाको अध्यक्षता, बबिन शर्माको सञ्चालन र अखिल नेपाल युवक संघ बागलुङका सचिव बिरेन्द्र थापाको स्वागत मन्तब्यमा सम्पन्न भएको थियो ।
