प्युठान । वरिष्ठ कम्युनिष्ट नेता खगुलाल गुरुङ १०३ वर्षमा प्रवेश गर्नुभएको छ । बिहीबार राष्ट्रिय जनमोर्चा प्युठानले नेता गुरुङकै निवासमा पुगेर जन्मदिवस मनाएको छ ।
त्यस क्रममा बोल्दै गुरुङले देशमा नयाँ जनवादी क्रान्ति अपरिहार्य रहेको चर्चा गर्दै नेकपा (मसाल) ले लिएको नीति र विचारले नै क्रान्तिको नेतृत्व गर्ने विश्वास व्यक्त गर्नुभयो । नेता गुरुङले आफ्नै जीवनकालमा क्रान्ति सम्पन्न भएर जनताको शासन आएको हेर्न आफू इच्छुक रहेको बताउनुभयो ।
उहाँले नयाँ पुस्तालाई कुनै पनि गलत विचार र भड्कावको पछाडि नलाग्न सन्देश पनि दिनुभयो । ‘कम्युनिष्ट आन्दोलनमा कैयौं गलत विचारहरु प्रकट हुन्छन् । कैयौं भड्कावहरु देखा पर्छन् । तर हामी यस्ता गलत विचार र भड्कावको शिकार हुनुहुँदैन’ उहाँले भन्नुभयो, ‘हामी हिँडेको बाटो अप्ठेरो छ । कठिन छ । तर लक्ष्यमा अवश्य पुगिन्छ ।’
फोटोः सुवास जिसी
गुरुङ निवास गौमुखि–७ कोइरामा भएको सो कार्यक्रममा राष्ट्रिय जनमोर्चाका सांसद दुर्गा पौडेलले नेता गुरुङलाई जन्मदिनको शुभकामना दिँदै उहाँको दिर्घजीवनको कामना गर्नुभयो । उहाँले खगुलाल गुरुङको अभिभावकत्वले पार्टी नेता कार्यकर्ताहरुमा उर्जा थप्ने विश्वास व्यक्त गर्नुभयो ।
कार्यक्रममा नेकपा (मसाल) प्युठानका प्रवक्ता ज्ञामुराम न्यौपाने, रुपन्देहीका प्रवक्ता नारायण जिसी र प्रदेश ५ का सांसद तारा जिसीले पनि नेता गुरुङलाई शुभकामना दिनुभएको थियो ।
राष्ट्रिय जनमोर्चा प्युठानका सदस्य सिद्धिलाल जिसीको अध्यक्षतामा सम्पन्न कार्यक्रमको सञ्चालन अखिल (छैठौं) का केन्द्रीय सचिव सुवास जिसीले गर्नुभएको थियो ।
खगुलाल गुरुङ २०१० सालमा कम्युनिस्ट पार्टीमा सामेल हुनुभएको थियो । त्यस यता उहाँ लगातार कम्युनिष्ट आन्दोलनमा सक्रिय हुनुहुन्छ । यद्यपी उमेर र स्वास्थ्यका कारण केही वर्षदेखि उहाँ त्यत्ति सक्रिय हुन सक्नुभएको छैन ।
२०१० सालमा कम्युनिस्ट पार्टीमा सामेल भएपछि उहाँ त्यही सालमा प्युठानको रातामाटामा तीन महिनासम्म चलेको जनता शिक्षण शिविरको शारीरिक प्रशिक्षक हुनुहुन्थ्यो ।
२०१५ सालमा भएको चुनावमा उहाँ हालको रोल्पाबाट, (जो त्यो वेला प्युठानमा नै पर्दथ्यो) मा उम्मेद्वार बन्नु भएको थियो । उहाँले थवाङसहित रोल्पाका गाउँगाउँमा पुगेर वामपन्थी जागरण ल्याउने काम गर्नुभएको थियो ।
यो पनिः संघर्षशील दीर्घजीवी अग्रजहरु
