काठमाडौं । एक साता अघि बागलुङको ढोरपाटन नगरपालिका–९ भुजिखोलामा आएको बाढीबाट क्षतिग्रस्त क्षेत्र अझै लयमा फर्कन सकेको छैन । बाढीले ठुलो मानवीय र भौतिक क्षति पुर्याएको सो क्षेत्र अहिले पनि विद्युत र सडकको पहुँचबाट टाढै छ ।
गत बुधबार आएको बाढीका कारण ३८ जना बेपत्ता भएकोमा बुधबारसम्म १९ जनाको शव भेटिएको छ । १९ जना अझै हराइरहेका र उनीहरुको खोजी जारी रहेको ढोरपाटन नगरपालिकाका मेयर देवकुमार नेपालीले युगदर्शनलाई बताउनुभयो ।
बाढीका कारण सो क्षेत्रको स्वास्थ्य, शिक्षा, यातायात र जलविद्युतमा ठुलो असर परेको छ । मेयर नेपालीका अनुसार १२० वटा घर पूर्ण रुपमा क्षति भएका छन् भने ५१ वटा घरमा आंशिक क्षति पुगेको छ ।
यस्तै, दुईवटा विद्यालय, ११ वटा पुल, १२ वटा जलविद्युत आयोजना र दुईवटा स्वास्थ्यचौकीमा क्षति पुगेको छ । सडकमा पनि ठुलो क्षति पुगेको छ । बाढीका कारण भुजीखोला पहिलो, दोस्रो, तेस्रो, चौथो र पाँचौँ, नेपाने देउराली जलविद्युत्, रुद्रताल लघु जलविद्युत् आयोजनासहित १२ आयोजनामा क्षति पुगेको हो ।
नगरपालिकाले तीनवटा डोजर परिचालन गरी आजदेखि सडक खुलाउने काम सुरु गरेको छ । यद्यपी जलविद्युत आयोजना र पुलको पुनर्निर्माणको काम नगरपालिकाबाट सम्भव नभएको मेयर नेपालीले बताउनुभयो ।
‘धेरै ठुलो क्षति पुगेको छ । नगरपालिकाबाट पुनर्निर्माणको काम सम्भव छैन । हामीले प्रदेश सरकारसँग आग्रह गरेका छौं’ मेयर नेपालीले भन्नुभयो, ‘प्रदेशबाट प्राविधिकहरुको टिम आएर हेरेर फर्किएको छ । मन्त्रीज्यूबाट पुनर्निर्माणको आस्वासन पाएका छौं ।’
मेयर देवकुमार नेपालीले विस्थापितहरु अहिले आफन्तकहाँ बसिरहेको जानकारी दिनुभयो । उनीहरुलाई खानपिन लगायत राहतको व्यवस्था गरिएको छ । अभिभावक गुमाएका बालबालिकालाई नगरपालिकाले नै संरक्षण गर्ने उहाँले बताउनुभयो ।
‘अभिभावक गुमाएका बालबालिकालाई सान्त्वना दिइरहेका छौं’ उहाँले भन्नुभयो, ‘अब उनीहरुको शिक्षा दिक्षाको व्यवस्था नगरपालिकाले नै गर्छ ।’
अहिले बाढीग्रस्त क्षेत्रमा विद्युत् नहुँदा द्वार, फल्लेघर, सुप्राङ, घट्टेपानी, दुनेपधेरा, भुसुन्दे, सुकुरुदुङ र लाकुरीबोट गाउँ अन्धकार भएको छ भने सो क्षेत्र सञ्चार सम्पर्कबाट बाहिर छ ।
यो पनिः ढोरपाटनका बाढीपीडितलाई राजमोद्वारा राहत वितरण
