ढोरपाटन । बागलुङको ढोरपाटन नगरपालिका स्थित भुजीखोलाका बाढीपीडितलाई राष्ट्रिय जनमोर्चाले राहत वितरण गरेको छ । राजमो जिल्ला अध्यक्ष अमर थापा र गण्डकी प्रदेश सांसद खिमविक्रम शाहीको नेतृत्वमा गएको टोलीले पीडित परिवारलाई राहत वितरण गरेको हो ।
घटनास्थलबाट अखिल नेपाल युवक संघका केन्द्रीय कोषाध्यक्ष भीमसेन वनले दिनुभएको जानकारी अनुसार राजमोले मृतक तथा वेपत्ता भएका २१ परिवारलाई जनही पाँच/पाँच हजार तथा विस्थापित ९६ परिवारलाई जनही दुई/दुई हजारका दरले राहत वितरण गरिएको हो ।
राजमोको टोली शनिबार घटनास्थलमा पुगी पीडित परिवारसँग भेटघाट तथा राहत वितरण गर्नुका साथै घटनास्थलको अनुगमन गरेको थियो । सो टोलीमा राजमो जिल्ला अध्यक्ष थापा र प्रदेश सांसद शाहीसँगै राजमोका जिल्ला सल्लाहकार गौरीश्वर पाण्डे, उपाध्यक्ष धर्म कुँवर, सचिव भीमराज पोखरेल, नेताहरु दुर्गादेवी घर्ती, लालबहादुर राना, तिलक थापा, भीमसेन वन, लोकेन्द्र निरासी, दीपक थापा, धनबहादुर अदै, मित्रदत्त ढकाल, विमल पाण्डे, जीवन घर्तिमगर लगायत सहभागी हुनुहुन्थ्यो ।
भदौ १७ गते राति भुजीखोलामा आएको बाढीले ढोरपाटन नगरपालिकाको बोबाङ क्षेत्रमा ब्यापक क्षति पुर्याएको छ । बाढीमा परी १६ जनाको मृत्यु भएको छ भने २२ जना अझै बेपत्ता छन् । सानो रुपमा बग्ने भुजीखोला अहिले ठुलो बगर बनेको छ । त्यस आसपासको बस्ती पुरै उजाड बनेको छ ।
हाल विस्थापितहरु आफन्तकहाँ र स्थानीय एक स्कूलमा शरण लिएर बसेका छन् । यसअघि घटनास्थलमा गृहमन्त्री रामबहादुर थापा तथा गण्डकी प्रदेशका मुख्यमन्त्री पृथ्वीसुब्बा गुरुङ लगायतका नेताहरुले अनुगमन गरेका थिए । केन्द्र र प्रदेशबाट दिइएको राहत हाल वडा कार्यालयमै रहेको छ ।
अहिले पीडितहरु हराएका आफन्तको खोजीमा खोलामै भौंतारिरहेका छन् । यस क्षेत्रमा कैयौं घरपरिवार पुरै बेपत्ता भएका छन् भने कतिपयका परिवारका अन्य सदस्यहरु हराएर वा मृत्यु भएर १/२ जनामात्रै बँचेको समेत अवस्था छ । घटनास्थलको अवस्था दर्दनाक देखिन्छ ।
यो पनिः
ढोरपाटन बाढी अपडेटः यस्तो छ क्षति र राहतको अवस्था
राहत वितरण गर्न राष्ट्रिय जनमोर्चाको टोली ढोरपाटन पुग्दै
