काठमाडौं । कोरोना भाइरसको संक्रमणका कारण विश्वका विभिन्न देशहरुमा यतिबेला लकडाउन गरिएको छ । नेपालमा पनि आधाभन्दा बढी जिल्लामा विभिन्न प्रकारका निषेधाज्ञा जारी गरिएको छ ।
लकडाउनका क्रममा गरिखाने वर्ग भोकभोकै मर्नुपरेको समाचार आइरहँदा नेपाल सरकारले उनीहरुलाई न कुनै राहतको व्यवस्था मिलायो न, त लकडाउन वा विषेधाज्ञाको विकल्प सोच्यो ।
तर, पाकिस्तानी प्रधानमन्त्री इमरान खानले भने लकडाउन गरेर जनतालाई भोकै राख्न नसकिने बताएका छन् ।
जनतालाई सम्बोधन गर्ने क्रममा प्रधानमन्त्री खानले भनेका छन्, ‘लकडाउन गर्नु भनेको कर्फ्यू लगाउनु हो । जनतालाई घरभित्रै थुनेर सडकमा सेना र प्रहरी परिचालन गर्नु हो । हाम्रो देशमा २५ प्रतिशत जनता दैनिक काम गरेर बिहान बेलुकाको छाक टार्ने गर्छन् । यदी हामीले लकडाउन गर्यौं भने उनीहरुले खाना खान पाउँदैनन् ।’
प्रधानमन्त्री खानले चीनमा कसरी लकडाउन गरियो र पाकिस्तानमा किन सम्भव छैन भन्ने पनि स्पष्ट पारेका छन् ।
‘चीन विश्वको दोस्रो धनी देश हो । चीनले लकडाउनका क्रममा आफ्ना जनतालाई दैनिक आवश्यकताका सामान पुर्याउन सकेको थियो । तर, हामीकहाँ त्यो सम्भव छैन’ खानले भनेका छन् ।
उनले जनतालाई सेल्फ आइसोलेसनमा बस्न पनि आग्रह गरेका छन् ।
हाल पाकिस्तानमा २ लाख ९५ हजार ८४९ जना संक्रमित भएका छन् भने ६ हजार २९४ जनाको ज्यान गएको छ ।
यस्तै, विश्वभर २ करोड ५१ लाख ९७ हजार ९३८ जना कोरोना भाइरसबाट संक्रमित भएका छन् भने ८ लाख ४६ हजार ५५२ जनाको मृत्यु भएको छ ।
