काठमाडौं । भारतका पूर्व राष्ट्रपति प्रणव मुखर्जीको सोमबार निधन भएको छ ।मुखर्जीका छोरा अभिजितले सामाजिक सञ्जाल ट्वीटरमार्फत आफ्ना पिताको निधन भएको जानकारी दिएका हुन् ।

‘गह्रौ मुटुका साथ यहाँहरुलाई जानकारी गराउनुपरेको छ कि हामी र आरआर हस्पिटलका डाक्टरहरुको सबै प्रयास र भारतभरका जनताको आर्शिवाद र प्रार्थनाका बाबजुद पनि मेरा पिता श्री प्रणव मुखर्जीको भर्खरै निधन भएको छ । यहाँहरु सबैलाई धन्यवाद,’ ट्विटमा अभिजितले लेखेका छन्।

८४ वर्षीय मुखर्जीको स्वास्थ्य अवस्था बिग्रँदै गएपछि विशेष डाक्टरहरुको निगरानीमा राखिएको थियो । अगस्ट १० मा दिल्लीस्थित सैनिक अस्पतालमा मुर्खजीलाई भर्ना गरिएको थियो ।

टाउकोमा जमेको रगत निकाल्न अस्पताल भर्ना गरिएका मुखर्जीलाई कोरोना भाइरसको संक्रमण पनि भएको थियो । शल्यक्रिया गरेको केही समयपछि नै उनी कोममा गएका थिए । एजेन्सी