काठमाडौं । सात समुन्द्र पारिबाट स्वदेश फर्कन ठिक्क परेको बेला विमानस्थलबाट जहाज रित्तै फर्कँदा र आफू उतै अलपत्र पर्दा कस्तो पीडा होला ? यो भोग्नेलाई नै थाह हुन्छ । तर, यस्तो पीडा यतिबेला दुबईका नेपालीहरुले भोगिरहेका छन् । त्यो पनि आफ्नै देशको सरकारको लाचारीका कारण ।
गत मंगलबार नेपालीलाई लिनका लागि दुबई पुगेको नेपाल एयरलाइन्सको जहाज रित्तै फर्कियो । उता नेपालीहरु एयरपोर्टमा अलपत्र परे ।
विमानस्थलको झन्झटिलो प्रक्रिया पुरा भयो । पीसीआर रिपोर्ट पनि आयो । बस्ने कोठा छोडियो, भएको पैसा सबै पठाइसकियो । जहाजमा चढ्न ठिक्क परेका बेला हजारौं किलोमिटर पार गर्दै जहाज रित्तै स्वदेश फर्कियो, आफूहरु उतै अलपत्र ।
नेपालीले भोगेको यही पीडालाई भिष्मकुमार भुसालले उल्लेख गर्दै फेसबुकमा लेख्नुभएको छ, ‘मलाई माफ गरिदेऊ परदेशी मित्र !’
उहाँ लेख्नुहुन्छ, ‘उता कोठो छोडेको छ, कम्पनीबाट बिदा भएको छ, पैसा पहिले नै पठाइसकेको छ, साथमा केही छैन, फर्केर जाउँ त कहाँ जाउँ ? ठाउँठाउँमा पिसिआर रिपोर्ट देखाउनु पर्छ । सडकमा सुत्न पनि लुगा छैनन् । सुत्न पनि पाइँदैन ।
बस्ने कुनै ठाउँ छैन । जाने कुनै बाटो छैन । खल्ती रित्तो छ । जतासुकै कोरोनाको आतंक छ। शायद ज्यूँदै नरकको पीडा भोग्ने दुर्लभ मान्छे हामीहरू हौं ।
सर त विभागको डिजी हुनुहुन्थ्यो पहिले । हाम्रो उद्धार गर्नु पर्यो सर- उनले रूँदै भने । म निरीह, अवाक र द्रवित भएँ । औपचारिकताको फ्याङ्ले शब्द फ्याँक्दै भने, ‘न आत्तिनुस् । सब ठिक हुन्छ ।’ नरोऊ भन्न सजिलो छ । आँशुको मूल थुन्न कति कठिन ।
हाम्रो जहाजले हजारौं लिटर इन्धन रित्याउँदै रित्तै आकाशमार्ग तय गर्यो । उता उनीहरूका आँशु रित्तिए कि अझै बग्दै होलान् ? मलाई माफ गरिदेऊ परदेशी मित्र…’
यो पनिः दुबई एयरपोर्टमा चार दिनदेखि अलपत्र नेपाली आइतबार स्वदेश फर्कने
