काठमाडौं । दुबईमा रहेका नेपालीहरुलाई उद्धार गर्नका लागि गत मंगलबार नेपाल एयरलाइन्सको विमान दुबई पुगेको थियो । घर फर्कन चाहने नेपालीहरुले पीसीआर परीक्षण गर्नुका साथै विमानस्थलको सबै प्रक्रिया पुरा गरेर जहाजमा चढ्न प्रतिक्षा गरिरहेका थिए ।
तर, अन्तिम समयमा सीसीएमसीले कोही पनि उद्धार उडान गरेर ल्याउन नदिएपछि निगमको विमान खाली फर्किएको थियो ।
यो घटनाले सरकारको चौतर्फी आलोचना भयो ।
@yogesbhattarai @IshwarPokhrel @PM_Nepal
यि तस्वीर युएईका हुन्, घर फर्किने आसमा दुतावासको सकस सकेर बिमानस्थलमा चेक ईन भई सकेकाहरुलाई नलिइकन फर्कने आदेशमा को जिम्मेवार छ? कोरोना नेगेटिभ रिपोर्टपनि थियो उनिहरु संग, वाहियात तर्क अंतलाई राखौंअबपनि
दोषीलाईलाई कारवाही नहुने नै हो? pic.twitter.com/za965JRKPL— bHUSANdAHAL (@DahalTbd) August 21, 2020
अब ती नेपाली आइतबार स्वदेश फर्कन पाउने नेपाल वायुसेवा निगमले जनाएको छ । मंगलबारको उडानबाट नेपाल आउन तयार भएर पनि आउन नपाएका यात्रु ल्याउन सरकारले अनुमति दिएको निगमकी प्रवक्ता अर्चना खड्काले जानकारी दिनुभयो । निगमले २ सय ६२ जनालाई आइतबार नेपाल ल्याउनेछ ।
सीसीएमसीको निर्णयका कारण सबै प्रक्रिया पूरा गरेर एयरपोर्ट पुगिसकेका समेत नेपाल आउन पाएका थिएनन् । एयरपोर्टसम्म आइसकेका यात्रु नेपाल फर्कन नपाएपछि विचल्लीमा परेका छन् । तर, सोही दिन टर्किस एयरलाइन्सले भने २०१ यात्रु लिएर नेपाल आएको थियो ।
यो सँगै सरकारले विभिन्न देशमा रहेका नेपाली नागरिक, विदेशस्थित नियोगका कूटनीतिज्ञ तथा कर्मचारीलाई नेपाल आउन नियमित उडान सुरु गर्ने जनाईएको छ । बिहीबार बसेको मन्त्रिपरिषद बैठकले विभिन्न देशबाट नेपाल आउनका लागि नियमित उडान गर्ने निर्णय गरेको स्रोतले बताएको छ ।
सरकारले मलेसिया, संयुक्त अरब इमिरेट्स (यूएई), दक्षिण कोरिया, थाइल्यान्ड, जापान, चीन, हङकङ, अस्ट्रेलिया, युरोप तथा अमेरिकामा रहेका नेपाली नागरिक मात्रै बोक्ने गरी नियमित उडान गर्न अनुमति दिएको हो ।
यस्तो यात्रा गर्ने व्यक्तिले ७२ घण्टाभित्रको पीसीआर नेगेटिभ भएको रिपोर्ट र नेपाल आएपछि क्वारेन्टिनमा बस्नका लागि होटलको बुकिङ गरेको हुनुपर्ने छ ।
